Vawlei daihnak le himnak ṭuanvo latu UN Security Council nih nizaan ah Myanmar buainak kong meeting a tuah ṭhan i China duhning in bia a chah ṭhan, Myanmar mipi duhning in bia a chat hoi lo.
Uknak firtu le mipi that tu Myanmar ralkap a bawmtu China le Russia hi UN Security Council zungzal chungtel an si caah ‘biachahmi leetnak nawl’ an ngei i anmah duh lomi cu UN Security Council nih a tuah kho lo.
Cucaah, nizaan UN Security Council meeting cu Myanmar ralkap bawmtu China le Russia diriamhter dingin ti an toih hnu ah a fil taktakmi cathanh an chuah.
China le Russia nih anmah miatnak caah Myanmar mipi nuai 54 harnak pek apoi ah an chiah lomi hi cu lungfak ngai asi.
A fil tukmi UNSC cathanh ahcun, “ASEAN nih Myanmar buainak kong bia a chahmi 5 kha a rannak in tlinter uh,” ati. ASEAN biachahmi 5 cu mah hi hmet law rel khawh asi.
UNSC chungtel nitlaklei ram pawl nih cun “buainak tel lo tein sandahpiahmi pawl ruru hranghrang in na lehrulhmi hna hi fak piin kan cohlan lonak kan langhter” ti le “ralkap nih asi khawh chungin i sum” ti zong cathanh ah telh an timh nain China le Russia nih an duh lo caah an telh kho lo.
Min langhter a duh lomi UNSC chungtel ram palai pakhat nih, “UNSC lungrualnak a rawh ahcun UNSC hi man ngei lo ah a cang lai, mah hihi kan hrial hrimhrim a hau,” tiah China le Russia duhning in bia an chahnak kong cu a chim.
Myanmar ralkap nih February 1 ah mipi cozah uknak a chuh thokin UNSC nih voi 4 khelte meeting a tuah cang i fakpi in cathanh chuah cu China nih a duh lo caah voi 4 ning tein fil deuh in cathanh a chuah peng.
