UNHCR Malaysia nih “June 1 in full lockdown (MCO 3.0) aa thok lai” tiin ralzaam pawl thawngthanhnak a tuah.
“Malaysia cozah nih 2021 June 1 in 14 tiang full lockdown (MCO 3.0) tuah dingin thawng a thanh. Hihi 2020 March thla ah tuahmi avoi 1nk MCO (MCO 1.0) bantuk kha asi lai. Chawhvah khap asi lai i a herh hrimhrimmi ti dah lo cu rian vialte khar dih an si lai. Zulhphung (SOPs) tling zong kan in thanh te hna lai.
“Hawikom i lenkai ti bantuk zatlang cawlcanghnak pawl khap an si. Asi khawh chungin inn ah um peng ulaw rawl silole sii ti bantuk a herh hrimhrimmi ca lawngah leng chuak uh.
“Ṭha tein mask i hruk, kut i ṭawl lengmang, na tonghtham lengmangmi thilri thianghlim tein chiah ti bantuk pumpak i thianhhlimhnak hna kha pehzulh tein tuah peng uh.
“Na zawt ahcun, inn na umṭi mi pawl he hmun khat ah umṭi lo asiloah hlat deuh in um i zuam. A ran khawh chungin COVID-19 i test law result na hngah chung vialte nangmah dang tein um peng.
“Thinphang tuk a simi a karh cuahmahmi COVID-19 khamnak caah Malaysia cozah nih a chuahmi zulhphung (SOPs) pawl hi ralzaam le ralzaam soktu hna nih zul cio dingin kan in forhfial hna.
“MCO kong le i bawmhnak kong thawngpang thar nan theih khawhnak hnga, Refugee Malaysia website hi punghman tein zoh lengmang uh,” ati.
![](https://thechinexpress.com/wp-content/uploads/2021/05/full-lockdown-un-thawngthanh-808x1024.jpg)
Atu lio cu UNHCR zung kal a ngah lo
Malaysia cozah nih chawhvah a khap caah atu lio cu hohmanh UNHCR zung kal a ngah lo.
“UNHCR nih zung ah ra dingin phone chawnh cangmi pawl zong tu hnu thawng thanh ṭhan hlan tiang ra rih hlah uh. Hnu ah phone kan in chawnh ṭhan hna lai i a thar in rat ni kan in chimh ṭhan te hna lai,” tiah UNHCR nih May 12 ah thawng a thanh cang.
UNHCR he aa bawmmi zung pawl; IOM, RSC le ICMC ti bantuk pawl nih zung ra dingin an in chawnh cangmi hna zong anmah nih adang tein an in chawnh ṭhan te hna lai.
![](https://thechinexpress.com/wp-content/uploads/2021/05/un-zung-ra-hlah-uh-1024x916.jpg)