Kum 19 te lawng a si rihmi mino te Cung Dawt Cem cu a nupi he Zarhpini zaanlei 5pm ah an len lio ah aho si hngalh lomi nih meithal in an kah i chanh khawh loin Nikhatni (January 18) zaan ah Methodist Sizung ah a nunnak liam.
Cung Dawt Cem cu Zephai khuami Pu Cung Mang le Ngalang khuami Pi Thla Hniang hna i an fa upabik asi.
US ram, Indianapolis khuapi ah ummi an si. Aa um kami te an si. Cung Dawt Cem nih mawṭaw a mongh i a nupi cu a pawngah a ṭhu.
South Meridian lamton traffic an phak lio ah an hmai in mawṭaw raang nih a kham hna, kehlei in mawṭaw ngun (silver) nih a kham hna. Cutin an deet hna i meithal in an kah.
A nupi nih, “zei ruang dah a kan kah ti ka hngal lo. Nain timh ciammaam tein a kan zulh i a kan kahmi si. Kanmah he naih tein an mongh. Rap fawih in a kan fawih,” tiah a ṭah buin a chim.
“Atutiang ka tuksum peng. Ka mit kaa chinh fatin a kan kah lio ka mithlaam cuang peng. A har tuk. Zei ruang dah ka vapa cu an thah hnga? Mi dawt a thiam tukmi asi, misual zong asi lo.
“Kan pa cu alu ah an kah, a thaw a chuah rih nain a lungfim lo. Nikhatni zaan ah sizung ah a nunnak liam.
“Ka nunnak in ka duhdawtmi minung ka hmaika ah an thah cu ka nun chung ka tonmi vialte lakah a fak bik si.
“A kan kaptu cu fiang tein ka hmu manh lo nain, Kawlrammi (Laimi) asi hrimhrim ti ka chim khawh.
“Zei ruang dah nan miphun cu nan thah? Hruh taktak asi. America kan ratmi hi kan miphun kah le thah ruah ah asi lo. Zei ruang dah nan sining le nan ratnak nan i philh?,” tiah lungkuai in a chim.
Indianapolis cu US ram ah Chinmi kan tambiknak khua, thong 20 hrawng kan umnak asi nain atu bantukin kanmah le kanmah i thah hi a um bal lo.
Kum 2020 ah Indianapolis khua ah minung 245 thah an tong. Mah chungah minung 1 lawng hi Asian mi asi. A that tu cu palek nih an tlaih. Asian lainawng cu tlaih khawh lomi an um rih lo tinak asi.
Nain, Cung Dawt Cem a that tu balte cu atutiang palek nih an hngal rih hna lo. A hngalmi nan um cun palek phone number 317-262-TIPS ah thawng kan thanh uh, tiah palek nih an ti.
