US ram, Indianapolis khua um Cung Dawt Cem, kum 19 cu meithal in an kah caah nizaan January 18 deilei ah a nunnak liam.
Pu Cung Mang (Zephai) le Pi Thla Hniang (Ngalang) hna i an fapa rosung asi.
Zarhpini zaanlei 5pm ah mawṭaw aa mongh i South Meridian Street lam ton a phak lio ah mawṭaw in an hung pah i meithal in an kah.
A hmun ah palek an hung phak ahcun Cung Dawt Cem cu meithal kahnak hma he an hmuh i Methodist Hospital ah an kuat.
A hma fah tuk caah oxygen an bunh i an thlop colh nain chanh khawh loin a nunnak liam hi si.
Minutes 15 hnu ah, Cung Dawt Cem an kahnak in meng 4 hrawng a hlatnak Burkhart Drive i 4100 block ah kum tlinglo minung pakhat meithal kahnak hma he palek nih an hmuh ve. Riley Hospital ah an kuat.
Cung Dawt Cem a kaptu he aa pehtlaimi an si lai, tiah palek nih an zumh.
Zei ruang dah an kah hna ti cu palek nih an hlat lio asi.
