- US Chin Baptist Khrihfabu Dihlak fonh CBCUSA nih Mizoram ah a zaammi Chin ralzaam an va tlawn hna
- Mizoram cozah cungah lunglawmhnak bia an chim
- India ah a um cia cangmi UNHCR card aa tlaih cangmi pawl ram thumnak kal khawhnak caah a rami kan si lo
- CBCUSA nih cun Mizoram ah a zaammi Chin ralzaam hna hi Laitlang ah kirter i Laitlang ralzaam buk IDP Camp ah umter hna ding hi tha kan pekmi asi
US Chin Baptist Khrihfabu dihlak fonh ‘Chin Baptist Churches USA (CBCUSA)’ hruaitu pawl nih Mizoram ah a zaammi kan miphun Chin ralzaam an va tlawn hna i thazaang peknak bia an chimh hna, cun Christmas laksawng ah Rs 100,000 cio an pek hna.
Ralhrang ruangah harnak a tongmi kan miphun a zohkhenhtu Mizoram cozah zong an ton i lunglawmhnak bia an chim.
Chin ralzaam veh dingin le Mizoram cozah sinah lunglawmhnak bia chim dingin CBCUSA nih a thlahmi hna cu;
- CBCUSA GS Rev. Dr. Thlaaw Bawihrin
- CBCUSA Nubu hruaitu Rev. Sui Hliang Chorei le
- Washington DC um Pu Stanly Hram Uk an si.
CBCUSA GS Rev. Dr. Thlaawr Bawihrin nih, “Ralhrang ruangah Mizoram ah a zaammi kan unau hna a zohkhenhtu le him tein a chiatu Mizoram cozah sinah lawmhnak a thar in CBCUSA min in chim ṭhan ka duh,” ati.
“LADC le MADC ram ah a ummi hna zong anmahle district cio in an zohkhenh hna, LADC CEM V Zirsanga, MADC CEM N Zakhai le an ṭuanhawi cungah lunglawmhnak chim ka duh ko.
“An si khawh chungin an zohkhenh hna, umnak inn an sakpiak hna, ti le mei an tuahpiak hna, a herhmi paoh CYMA le CYLA, MTP he rian an ṭuanṭi. Upatnak ka pek hna.
“Kan unau an si, kan eimi an ei ve lai, kan umnak ah an um ve lai, tiah unau chuak khat thinlung an ngeihnak kan theih tikah lung a hmui hringhran ko.
“Hnahthial District nawlngeitu upa hna he kan i ton tikah a tlizammi hna cungah zawnruahnak an ngeih ning, district upa hruainak in inn an sak piak hna, nunnak caah a herhmi an bawmh hna. Bawipa nih Mizoram cozah le mizapi thluachuah pe chin hna seh.
Biahalmi lehnak
“India ah a ummi ralzam hna ram thumnak kalnak caah an ra? tiah biahalnak a um ngai.
“Ram thumnak kalnak tuaktan dingah kan ra lo.
“India ah a um ciami UNHRC card aa tlaih cangmi hna ram thumnak an kal khawhnak caah a rami kan si lo.
“CBCUSA nih cun Mizoram ah a tlizammi kan miphun hna, kan ram ah kir ṭhan in IDP camp ah um hi thazaang pekmi asi. Kan ram zaamtak loin ram chungah himnak khuar in IDP a zohkhenhtu NGO hna he rianṭuanṭi hi thlacamnak asi.
“Bawipa nih Chinram le Chin miphun himnak pe hram seh.
“Bawipa cu kan himnak le kan teinak asi,” ati.
