US khuasa Thang S. Mung, kum 36 nih nupa sualnak video 3 mi a kuat hna, a kuatmi minung nih palik sinah an report i palik nih an tlaih.
Kum tlinglo nu pawl nih nupa sualnak an tuah lio video 3 cu mi a kuat hna.
Thang S. Mung hi Kentucky state, Bowling Green khuapi ah a ummi si.
‘Kum tlinglo nupa sualnak video na kuat hna’ timi upadi phun 3 in taza an cuai.
Palik nih thil sining tling deuh in an hlat cuahmah liopi asi.
Atu lawlawse cu Warren County Regional Jail thong ah an thlak.
Laipa i ralring uh
Hi bantuk video le hmanthlak thurhnawm kuat a hmangmi Laipa nan tamtuk. Malaysia um Lai nungak pawl zong nan kuat lengmang hna.
Malaysia, Singapore, Australia, US, Canada, Norway, tbk ramkip ah hi bantuk video le hmanthlak kuat a hmangmi cu report in thongthlak khawh nan si.
Thawngpang dang rel awk: Malaysia Lai nu nih a tonmi
Malaysia Lai nu, Hannah Sui cu a rianṭuannak Kuala Lumpur um Sungei Wang kungṭeih ah Lahwahkah nih August 29 ah ramdangmi tlaihkhihnak an tuah i an tlaih thongthlak dengmang. Hihi atu lio Malaysia Chinmi dihlak kan dirhmun cio asi.
Atu hi UNHCR Malaysia cazin ah Chinmi 22,490 kan um. Mah chungah 18,000 hrawng hi UNHCR catlap aa tlaihmi kan si i kan him lo tuk. Card in thlenpiak zokzok dingin kan pale nih UNHCR kan chimhpiak uh.
UN catlap aa tlaihmi pawl hi kum 2013 ah UNHCR nih card pekmi lawngte an si ko hna nain 2017 le 2018 ah an card tat-ṭan an ṭu tikah card pek ti loin catlap a pek viar hna.
Card an rak i tlaih lio ahcun an him deuh ngai, nain catlap an i tlaih hnu cun atanglei video ah Hannah Sui nih a tonmi a chim bantuk hin ni fatin lengchuah le rianṭuan kal paoh ah thinphang le lungrethei in a um peng hna.
UNHCR cazin ah ai tel lomi Chinmi zong 20,000 hrawng kan um lai tiah zumh asi. Hi vialte zong card pek dingin Australia le US um Chinmi kan pale nih UNHCR le nan cozah sinah kan chimpiak ko sawh uh.
