US ram, Tennessee state um Kroger eidin dawr ah Uk Thang, kum 29 nih meithal in mipi a kah hna i minung 1 a thah pinah adang 14 a hliam hna.
Amah zong amah tein aa kap that lawlaw. A nulepa cu refugee in Nashville khua ah a rak phanmi an si.
US cozah nih ‘refugee an si i zaangfak an si…’ tiin a ram ah a kan lak i hitin a ram mipi kan thah hna cu a poi taktak.
Uk Thang hi Collierville khua um Kroger eidin dawr ahhin sushi dawr a tuah vemi asi i ni fatin hika ah rian a ṭuanmi si, tiah palik nih an chim.
“Kroger dawr ah palik kan phak hnu minutes tlawmpal ah, dawr kam ah amah tein aa kap that lawlaw.
“Uk Thang nih a kahmi hna cu Kroger dawr ah rianṭuanmi 10 le thil cawmi 5 an si. Pakhat cu a thi, adang cheukhat zong sizung ah lungfim loin an um hna, an nunnak caah thinphang ngai asi.
“Uk Thang nih a kah thahmi cu Olivia King, kum 70 asi. Fa 3 a ngeimi nuhmei asi,” tiah palik nih an chim.
Nuhmei nu a fale 3 le hliam tongmi minung 14 an chungkhar, pawngkam mipi le mah thawngpang a theimi US mipi nih zei tluk in dek Myanmar Chin refugee a kan huat lai.
“Nuhmei nu a fale lak i pakhat Wes King nih, ka nu cu a ṭang ah a kah i thi tiah Facebook ah a ṭial.
“Sizung ah an kalpi nain a nunnak an khamh kho lo. Zaangfahnak tein tuksapur a simi ka nu hmanthlak cu tar hin hlah uh tiah kan nawl hna.
“Hi bantuk sualnak hi zoh sawhsawh ding asi ti lo. Hohmanh hitin thah an ton awk asi lo,” ati.
Palik nih Uk Thang inn cu an luhhnawh i chek dingin phone le computer vialte an lak dih.
“Zei ruang dah hitin a kah hna timi theih kan duh cio,” tiah Collierville khua palik bawi Dale Lane nih a chim.
Uk Thang a nulepa inn ah thlacam ah kal tawnmi Aung Kyaw nih, “Uk Thang a nulepa cu Nashville khua ah an um. Myanmar Khrihfa ralzaam an si,” tiah a chim.
“Uk Thang hi Collierville Kroger dawr chungah sushi dawr a tuahmi si.
“An fapa nih hi bantuk thil a tuah cu a nulepa an lungrawk tuk hringhran. A kahmi hna dihlak caah thla an cam.
“Uk Thang hi keimah he cun kan i hngal lo,” ati.
Uk Thang nih meithal in a kah hna lio ahhin aho thengte hi ka kah lai timi tinhmi a ngei lo. A hmuhmi paoh a kah dih hna, tiah palik nih an chim. Sau zong a rau manh lo, palik tam taktak an hung phan colh.
Palik bawi Lane nih, “September 23 zaanlei 1:30pm hrawngah Kroger eidin dawr ah meithal kahnak a chuak tiin phone a kan chawnh cangka in a hmun ah palik torlecheng kan phan colh. Zei rank ti um loin palik vialte a rannak in kan kal dih. A off day simi palik pawl tiang an ra dih. Tlai deuh usih law hi nakin minung tampi kah an tong kho,” tiah a chim.
“Ahohmanh dawr chungah an lut ngam lo. Dawr chungin minung tampi thisen he an hung zaam. Palik kan phak cangka in dawr cu kan luhhnawh colh i kan si khawh chungin kan bawmh hna,” ati.
Zei ruang dah Uk Thang nih hitin mi a thah?
Palik nih cun aruang an chim rih lo nain, Kroger dawr rianṭuan pakhat nih a chimmi um.
Kroger dawr ah rianṭuan vemi Lawanda Clark nih, “Uk Thang hi dawr manager pawl nih an phuah hnu ah hi thil a tuah hi si,” tiah a chim.
“Uk Thang cu Kroger dawr manager pawl nih rian phuah (a sushi dawr kharpiak) dingin bia an chimmi ka theih.
“Zingka 9am hrawngah va ṭin an ti i a duh lo nain palik kan chawnh lai an ti hnu ah a ṭin. Mah zaanlei ahcun hi bantuk thil a tuah hi si.
“Uk Thang hi mi holh tlawm asi. Sushi a tuah ṭimi phohte pawl he lawng aa chawn. A rianṭuan ṭi pawl he bia aa al pah lengmang.
“Keimah nih cun ka chawn tuk bal lo. Amah um in um duhmi si rua ka ti. Mi he chawnh a duh lo, tiah mi nih an chim.
“Kan rianṭuan-hawi nih hi bantuk thil a tuah cu tuksapur taktak asi. Kroger dawr rianṭuan vialte kan tuksum dih.
“Mah pa hi, a umtu ning a hman pah rengreng loh. Hi bantuk hi rak zoh sawh ding asi bak lo,” ati.
