US ram, Pennsylvania state um Za Uk Lian nih Nithumni zingka dei hlan ah meithal in minung 1 a kah thah hnu ah amah tein aa kap that ve.
Updated: Hmasa ahcun ‘minung 2 a kah hna’ tiin nawlngeitu nih an chim nain, hnu ah minung 1 an theih chap. Anih cu hliam tong lo. A mawtaw lawng khen.
Za Uk Lian cu South Whitehall Township ah a ummi si. Upper Macungie Township um Wawa gas station ah a kah thah.
Thil phor mawtaw (truck) mongtu a kah thah i mawtaw dang aa citmi pakhat zong a kah hliam hnu ah a zaam i Route 100 lam kam ah amah tein aa kap that.
Za Uk Lian nih thil phor mawtaw mongtu a kah thahnak aruang cu kan hngal rih lo, tiah Lehigh County District Tazacuaitu Cozah Sihni Jim Martin nih a chim.
Za Uk Lian a hawipa Abraham Pa Cawi nih, “Za Uk Lian he kan i theihnak kum 20 hrawng asi cang. Za Uk Lian cu refugee in Seattle khua ah a phanmi si. Liamcia kum 8 ahkhan Lehigh Valley ah kai ṭhial i Za Uk Lian cu rak i ṭhial ve tiin ka sawm,” tiah a chim.
“Myanmar zongah khua khat kan si. South Whitehall zongah innpa kan si.
“Za Uk Lian hlan kum 2 hrawngah keimah hi US ka phan hmasa. Za Uk Lian cu a phakka ah holh a thiam lo pinah US ah chungkhar zong a ngeih lo caah keimah nih rian kawl le zung kal tibantuk ka zulh bawmh tawn.
“Chungkhar a ngeih lo caah a thihmi kong zong cu palek nih keimah sinah thawng an ka thanh.
“Minung 2 meithal in a kah hna hnu ah amah tein aa kap that an ka ti cu ka lau tuk,” tiah a chim.
Abraham Pa Cawi cu South Whitehall um First Presbyterian Church ah Pathian rian ṭuanmi asi.
“Za Uk Lian cu kan khrihfabu ah lead guitar a tummi si. A thah hna ti thawngpang ka theih cu kai zumh kho lo. Zei ruang dah mah thil hi a tuah ti cu ka hngal bak lo. Miṭha ngai asi ko.
“Thawngpang an theih cangka in kan khrihfabu le a ṭuan hawi pawl nih ‘kanmah Za Uk Lian kha asi maw?’ tiah ca an ka kuat cio.
“Holh a thiam lo caah le a ṭuan hawi pawl he a umṭi lo caah a caan cun a lungrawk tuk tawn. Naite zawtnak ruangah rian an ka phuah lai ti zong a phang, inn cawk zong ai tim fawn.
“Nihnihni zaan ah Za Uk Lian nih phone aa ka chawnh i tangka na ka cawimi tlawmpal kha ka herh pah cang nain ka herh tuk cu si leemlo aa ka ti. A sau pah tak cang i kan pek colh lai ka ti, zei pipa ah ka ruat lo.
“Pulrai aa thawk hnu in pawngkam minung nih phun dang ngai in an zoh caah a caan cun a lungrawk ngai,” tiah a chimchap.
Za Uk Lian cu South Whitehall khua Harold Avenue lam um inn 1 ah a hawile 2 he an um.
Min langhter a duh lomi a umṭi hawi pakhat nih, “Kan 3 in inn 1 ah kan um ṭi hna i kan dihlak in Amazon kudawng ah thil chiah rian kan ṭuan hna. Nain, Za Uk Lian cu naite in khan Upper Macungie um Home Depot ah a ṭuan,” tiah a chim.
“Kan ṭuan caan aa khah lo caah inn kan um caan zong aa khat lo i kan i hmu tuk lo. Za Uk Lian hi zaaan ah a ṭuanmi si. Nihnihni zingka ah rianṭuanak in a ṭin lio ah kan i hmu. Mah cu hnu bik ka hmuh si. Kan rian kong tlawmpal kan i ruah i a ziaza aa dang deuh ti a ruah awk zeihmanh ka hngal lo.
“Nithumni zingka ah palek nih an kan ṭhangh i Za Uk Lian a thihmi kong cu an kan chimh. Meithal a ngei maw? tiah palek nih an ka hal. Meithal a ngeihmi ka hngal bal lo, hngal ning law a sinah ka um hnga lo.
“Atutiang ka khuaruahhar peng ko,” ati.
