US ram, Indianapolis khuapi ah meithal kahnak a chuak i minung 6 an thi. Kum tlinglo pakhat zong zual hma ngai in sizung an kalpi.
Indianapolis khuabawi Mayor Joe Hogsett le Palek Bawi Ranfall Taylor nih, “sual chiahru taktak asi,” an ti.
Liamcia kum 10 chungah, Indianapolis khua ah minung tambik thah an ton ni asi.
Meithal kah a chuahnak zawn hi Adams Street i 3500 block ah si i Zarhpini zingka 4am ah asi, tiah palek nih an thanh.
Hmasa ahcun, E. 36th Street ah meithal kahnak a chuak tiin palek an chawnh hna. A hmun an phak ah kum tlinglo pakhat meithal kahnak hma he an hmuh. Sizung ah an kuat. A hma fak tuk ko nain a nunnak caah ṭihnung si lo.
Kum tlinglo meithal kah a tonmi cu palek nih an hlat tikah Adams Street lam pawng um inn pakhat chungah minung tampi meithal kah an tonmi an hmuh.
Thah a tongmi minung 6 lakah naupawi nu le a hrin rih lomi ngakchia zong an i tel, tiah palek nih Zarhpini zaanlei ah an thanh.
Thah tongmi 6 cu hrin rih lomi ngakchia pakhat le kum 19 in 42 kar minung an si hna.
Palek nih, “Timh ciammaam tein an thahmi hna si lai ti kan zumh. Thil sining tling deuh in kan hlat lio asi,” an ti.
Indianapolis khua ahhin Chinmi 20,000 hrawng kan um. US ram ah Chinmi kan tambiknak khua asi. Nain, atu meithal kah a chuahnak hi cu chaklei, minak pawl an tamnak asi. Chinmi cu thlanglei ah kan um hna.
