US pa cu vom nganpi nih thi lakin a seh, vom cu palek nih an kah thah, tiah US media pawl nih an thanh.
US ram, Montana state um Yellowstone National Park tupi chungah vom nih a seh hi si.
Carl Mock timi pa cu Yellowstone National Park tupi kalnak pawngum West Yellowstone khuami asi. An khua chaklei um Madison River ah nga sio dingin a kal lio ah vom nih a seh hi si.
Vom nih a seh lio ahcun lakhruak poipang bawmh halnak number 911 a chawnh. Mi chanhtu nih minutes 50 chung hrawng an kawl hnu ah an hmuh. Vom nih alu le hmai fak tukin a huah/kheuh. Sizung ah an kalpi nain ni 2 hnu ah a nunnak liam.
A sehnak hmun in pe 150 hrawng a hlatnak hmun ah nengpi ruak an hmuh. Mipa nih hin nengpi ruak lak a timh caah vom nih a sehnak si men lai, tiah an zumh.
Carl Mock cu Yellowstone National Park le pawngkam tupi pawl ah khualtlawng lam hruaitu (guide) rian a ṭuanmi si, tiah a ṭuannak company Backcountry Adventures nih ngaihchiatnak thawng a thanh.
Ramtang vah a zuam ngaimi le khualtlawng a daw ngaimi si, ati.
Vom nih sehlonak caah kahnak ‘vom ṭhawl kahnak (bear spray)’ a ngei ko nain a seh lio ah a kap manh maw ti cu hngalh asi lo.
Thil sining a hlattu palek pawl zong vom nih cun seh a timh hna caah an kah thah. ‘Kan kah thahmi vom hi Carl Mock a sehtu vom asi’ tiah nawlngeitu nih an chim.
