A rannak in Myanmar democracy ngahter ṭhan dingin pehzulh in kan ṭuan lai, tiah US President Joe Biden nih South Korea President Moon Jae-in he media sin thawngthanhnak an tuah lio ah a chim.
President Biden nih, “Myanmar ralkap le palik nih mipi ruru hranghrang in an tuahto mi hna hi kan cohlang hrimhrim lo. Myanmar ram nih a rannak in democracy a hmuh ṭhannak hnga, tlaihmi vialte an luatnak hnga le ruru hranghran in mipi doh a donghnak hnga, pehzulh in kan ṭuan lai,” tiah a chim.
President Biden cu North Korea kong ceih dingin a rami South Korea President Moon Jae-in he Ningani ahkhan Washington ah media sin thawngthanhnak an tuah i atu bantukin a chim hi si.
Myanmar ralkap sinah hriamnam zuar lo dingin le Myanmar mipi dornak pek cio dingin ramkip forhfialnak bia zong a chim.
