South Africa ram ah COVID-19 hrik thar an hmuh i ‘Omicron’ tiin min an sak. Mah hi COVID-19 ci voi tampi aa thleng cangmi a si i chawnh a fawi tukmi asi.
US President Joe Biden nih, “Chawnh a fawi tuk hringhranmi COVID-19 hrik thar Omicron hi kan ram ah an luhpinak hnga lo South Africa le pawngkam ram 7 cu hmai zarh Nikhatni thokin US tlawn kan phih cang hna,” tiah thawng a thanh.
US tlawn phihmi ram 8 hna cu;
- South Africa
- Botswana
- Zimbabwe
- Namibia
- Lesotho
- Eswatini
- Mozambique le
- Malawi hna an si.
Sinain, acunglei langhtermi ram ah a ummi US rammi, US PR le an nupi/va cu US luhter an si ko lai.
President Biden nih, “Kan i ralrin a hau,” tiah thawngla pawl sinah a chim.
“Omicron kong hi tampi kan thei kho rih lo. Chawnh a fawi tuk i ṭihnung tuk asi ti pin cu kan theihmi um rih lo. Kan scientist pawl nih a ran khawh chungin hlathlainak an tuah cuahmah. Dr. Fauci nih a hruaimi Covid phu he nazi cheu chung tonbiaruahnak kan ngeih hnu ah hi ram 8 cu khual tlawn phih chung dingin bia kan chah hi asi,” ati.
Omicron cu Vawlei Ngandamnak Bu (WHO) zong nih, “Ṭihnung tukmi COVID-19 hrik thar asi…” tiin thawng a thanh cang.
Australia zong nih South Africa le pawngkam ram 8 (dihlak ram 9) cu Australia tlawn a phih ve cang hna.
