Myanmar ram ah February 1 ah ralkap nih uknak a lak thok in harnak a tongmi khuapi tampi lakah a zaammi tambik an umnak hmun pawl ah eiawk kan bawmh hna lai, tiah World Food Programme (WFP) nih April 22 ah a thanh.
Rawltam i khah loin um lio ah Myanmar ram chung buainak ruangah dineiawk ngei lomi minung 2 million cu dineiawk kan bawmh hna lai tiah WFP nih a ti.
Yangon le pawngkam khua ah a ummi mipi pawl cu caan tling tein rawl an ei lo, vitamin aa telmi tirawl an ei khawh lo pinah ei awk caah leiba he an i ciah. Rian ngei loin an um i tangka hmuhnak an ngei lo tiah WFP nih a ti.

Cu ruangah, WFP nih Yangon ramtthen chung um peng 10 ah eiawk kan bawmh hna lai i thil sining zoh chih in a herh ahcun ral ruangah a zaammi pawl zong kan bawmh te hna lai a ti.
WFP nih thilman a tuak ning ah Myanmar ram pumpi ah January thla thokin facang man 5%, February thla thokin chiti man 18% a kai a ti. Cun, datsi man zong 30% hrawng a kai a ti fawn.
Cu ruangah, WFP nih bawmhnak pek kan timhmi hna hi minung 1 million in 3 million leng tiang zong an phanh khawh caah US$106 million hlut dingin mibawmtu pawl sinah nawlnak zong a tuah.