Kum 2022 ah Qatar ram ah tuah ding FIFA World Cup ah i tel khawhnak puai round 2nk cu Japan ram ah an tuah.
Japan vs Myanmar chuih dingin ram hla an sak lio ah Myanmar goal bawhtu Pyae Lyan Aung nih a kutdong 3 thlir in Kawl Ralkap duhlonak a langhter hnu ah ‘Myanmar ka kir ngam ti lo’ tiin Japan ah refugee a sok.
Japan cozah zong nih refugee ah cohlan/lo a ruahpiak lio asi.
Myanmar cu Japan nih goal 10-0 in an tei hna. Mah hnu zongah Myanmar cu a sung len rih. World Cup ah aa tel khawh lo ding a fiang cang.
Nithumni ahkhan Myanmar team cu Japan in an kir cang nain Pyae Lyan Aung cu kir loin Japan ah refugee a sok.
“Ralkap nih Myanmar um kan inn an luhhnawh caah ka chungkhar le ka chuih hawi pawl kongah ka thinphang,” tiah Pyae Lyan Aung nih thawngla pawl sinah a chim.
“Myanmar kir cu ka nunnak caah ṭihnung asi. Japan ah um lawlaw dingin kai sungphiat. Japan cozah le mipi nih Myanmar boruak hi an theih hrimhrim a herh. Bawmh kan hal hna,” tiah Osaka khua ah Japan media NHK sinah holhlet sin in a chim.
Brave #Myanmar goalkeeper Pyae Lyan Aung flashes a three-finger salute at the World Cup qualifier against Japan tonight, a protest against the military coup. Some players boycotted the game, saying they did not want to represent the junta.#WhatsHappeningInMyanmar pic.twitter.com/oB4WlA4zRU
— Poppy McPherson (@poppymcp) May 28, 2021
A sihni Shogo Watanabe nih, “Pyae Lyan Aung cu Osaka silole Tokyo khua ah refugee kan sok piak,” tiah AFP sinah a chim ve.
“A rannak inn refugee ah cohlang colh hna seh ti ka duh. A thlathla in a rau khomi si,” ati.
Amah lawng si loin, Myanmar team zaanglek 10 hrawng zong nih ‘ralkap caah bawlung chuih kan duh lo, uknak firtu ralkap aiawh kan duh lo’ tiin kan hnu thla ah ralkap duhlonak an langhter ve.
