Nizaan ahkhan Yangon ah bomb tam ngai a puak i ralhrang Myanmar ralkap a tlawmbik 3 paoh hliam an tong, tiah The Irrawaddy media nih a thanh.
Ralkap nih umhmun an khuarnak Yankin peng GAD zungah zahan zaanlei 2pm ah innser bomb 3 an puak i ralkap 3 cu fak tukin hliam an tong.
Yankin peng GAD zung cu March in khan ralkap nih an sakhan ah an hmanmi si.
Hliam tong ralkap 3 lakah 1 cu a nunnak caah thinphang asi, tiah palek nih an chim.
“Bomb cu leng lei in an rak cheh. A puakmi thawng thangpi cu kan theih. Hnu ah, hliam tongmi pawl cu ambulance nih a kalpi hna,” tiah Yankin peng minung pakhat nih a chim.
“Ralkap mawṭaw pawl zong bomb a puah hnu ah an hung phan. Mipi hohmanh inn leng an chuak ngam lo,” ati.
Ralkap Ni ah ralkap nih an hmanmi U Wisara Lam um hmun pakhat kutka hram zongah zaanlei 4:15pm hrawngah bomb a puak.
“A puakmi thawng thangpi kan theih i a khu zong kan hmuh,” tiah pawngkam mipi nih an chim. Hnu ah, ralkap nih lam a phih i a check.
Mah hin cun hliam tongmi an um lo, tiah a hmutu nih an chim.
Mayangone, Kamayut, Sanchaung le Yankin peng hmun cheukhat zongah Ningani zaan ahkhan bomb an puak len, tiah pawngkam mipi nih an chim.
Bomb a puah hnu ah, Zarhteni zingka ah ralhrang ralkap pawl nih Sanchaung, Ahlone, Kamayut le Mayangon peng inn tampi an luhhnawh i an thlok. An thlok lio ahcun mino cheukhat an tlaih velh hna.
