Tu zingka ah Yangon khua chung zalam cungah sang NLD hruaitu an kah thah, pawngkam ummi pakhat an hliam.
Aho si hngalh lomi pakhat motor chungin a hung chuak i a kah thah hi si.
Kah thah a tongmi cu Khin Nay Myo asi i Lanmadaw Peng, Sang 9 NLD Vice Chairwoman asi.
Zingka 5am ah Zaw Gyi market um facang dawr hmai ah a hawile 3 he bia an i ruah lio ah motor pakhat a hung ra. Motor chung cun minung pakhat a hung chuak i meithal in voi tam ngai a kah.
“Motor in a chuak, a zal chungin meithal aa chuah. A naih i a kah thluahmah. Timh ciammam tein an zulh kahmi asi men lai,” tiah a hawi pakhat nih a chim.
“A thattu nih dawr on tiang a hngah. Cun bia kan i ruah lio ah a hung kan naih ta duak i a kah. Caan tlawmpal chung a kan ngiat cang ṭheo lai ti ka zumh,” ati.
Meithal in voi 3 a kah. Voi 1 cu pawngkam ah paratha changreu a zuarmi kemit a khen. Minu cu aa thlop lio asi.
“Kan bawm uh” tiin kan au len ko nain hohmanh an ra lo. Kan pawng ah palik sakhan zong um ko nain hohmanh an ra lo. Cuka sang mibawmtu nih ambulance in Khin Nay Myo cu sizung an tlikpi nain lam tanṭim ah a nunnak liam, tiah a hawinu nih cun a chim.
“Ambulance cung khin kan timh lio ah palik motor pakhat a hung phan,” ati.
Liamcia thla tlawmpal cu uknak firtu Myanmar ralkap nih NLD hruaitu le chungtel pawl a ral tuk hna. A tlaih hna, hrem hna i thah hna.
Phyu Saw Htee group timi ralkap ṭanhtu pawl zong meithal a pek hna i ralkap a ṭuanter hna. Anmah zong nih cun ralkap dotu pawl an tlaih, hrem le thah lengmang hna.
