Yangon ramṭhen Pabedan peng NLD Chairman U Khin Maung Latt cu zahan zaan ah ralkap le palek nih an tlaih i tu zingka ah a thi.
U Khin Maung Latt a thi. A ruak cu Mingaladon Ralkap Sizung ah um, tiin Pabedan palek bawi nih chungkhar thawng a thanh hna, tiah November 8 thimnak ah MP a ngahmi Pabedan peng Pyithu Hluttaw MP U Si Thu Maung nih RFA ah a chim.
“Zahan zaan ah U Khin Maung Latt lawng si loin Pabedan peng NLD EC pawl an inn zong ralkap, palek le penguk bawi pawl nih an thlok dih.
“An tukvelh hna i an tlaih viar hna. Innkhaan chuak in a hung zohtu pawl zong meithal in an kah hna,” ati.
U Khin Maung Latt cu 2020 thimnak ah Si Thu Maung MP ngah dingin a bawmtu si pinah 2015 thimnak ah U Nay Phu Ba Swe zong MP ngah dingin a rak bawmtu asi.
U Khin Maung Latt hi muslim asi caah anmah biaknak phungphai ningin ruak vuinak kong an khaan lio asi.
