Zohnuam tuk: US mipi nih Wall Street mirum pawl $19 billion leng an miak hna – Financial Democracy

,

Wall Street mirum pawl le US mipi cu GameStop share kongah ral an i do.

GameStop (GME) stock/share man a tla lai i tampi kan miak lai ti aa ruahchanmi (short sellers) Wall Street mirum pawl cu social media Reddit a hmangmi nangmah keimah bantuk mirum lo mi sawhsawh pawl nih tangka $19 billion leng bak an sunghter/miak cang hna.

Wall Street mirum pawl nih GameStop share $17 hrawng asi lio ah share ngeitu sinah ceilak an hlan i azin $17 in an zuar. An i tinhmi cu, share man a tla lai i $8 hrawng asi tikah kan zuar ciami kha kan cawk lai i share kan cawimi pa sinah share cu kan cham lai, i a taangmi tangka $9 kan miak lai an ti. GameStop share 69 millions cu a dihlak dengmang (90% leng) bak cutin an hlan dih – January 8 ahcun GameStop (GME) stock $17 lawng asi.

Nain, nangmah le keimah nih Facebook kan hman bantukin Reddit a hmangmi mi sawhsawh (mirum lo) pawl nih WallStreetBets timi Reddit group an ser i “GameStop share hi caw cio usih law zuar hlah usih ….” an ti i share cu an cawk cio.

Wall Street mirum pawl nih an hlanmi pa sinah share pek a hau cang nain hohmanh nih shar an zuar duh ti lo caah anmah lila nih share man cu an kaih viar. $17 a rak simi kha $100 in kan cawk lai an ti, an zuar duh lo, $200 in an ti ṭhan i atu cu GameStop share man $347 bak a phan. 

Phun dangin chim ahcun, January 8 ah $17 in GME share a cawmi cu atu hi $347 a ngei cang tinak asi. $5,000 in share 294 a cawmi cu $102,018 a ngei cang tinak asi. $20,000 man a cawmi cu $6 million leng an ngei cang.

Cucaah, GameStop company zong cu $1 billion man (market cap) hrawng a simi kha atu cu $24 billion man ah aa chuah. 

WallStreetBets group cu atu hi member 4 million an si cang. “Nan share zuar rih hlah uh” tiin tha an i pe thluahmah rih hna. Mah ruangah share man cu a kai chin lengmang, hiti ning cun $1,000 zong a phante kho men. Wall Street mirum pawl an sung tuk cang i GME stock hi ni 30 chung that chung ti tiangin cozah hal an timh. GME stock ah mipi le Wall Street mirum pawl ral an i do.

Hlan ahcun atu bantukin mipi nih Wall Street mirum tumtlang pawl hi zatzat miak a um bal lo. Tu chan cu hopaoh nih phone app Rohinhood ah fawi tein stock cawk khawh asi cang caah atu bantukin mipi nih stock man an thlen khawh hi si. Cucu “Financial Democracy” ti zongin an auh.