Dr. Sasa cu UN palai ah an thim caah Health and Hope UK (HHUK) CEO in aa phuak/din. An phuak lo, amah tein aa phuak/din.
Myanmar mipi thimmi MP pawl nih United Nations (UN) palai caah an thim caah a ṭuan liomi HHUK CEO rian in aa phuah hi si.
Aa phuahnak kong cu “Rian kai phuak, zaangfah tein thla ka campiak cio uh” tiah atanglei bangin a ṭial.
“Dear hawikom le chungkhar hna, nan ka dawt, tha nan ka pek i thla nan ka campiak caah ka thinlung dihlak in kaa lawm tuk hringhran.
“Keimah nih ka dirhmi le kum 13 chung ka ṭuanmi bu in i phuah cu a har ko. Nain United Nations (UN) caah Myanmar palai an ka thimmi rian thar hi felfai tein ṭuan ka duh caah si.
“Mah rian thar hi a har tuk lai ti ka hngalh ko nain, caan sau tuk remruam chung a temtuar cangmi kan dawtmi Myanmar mipi auhnak hi ka al kho ti lo.
“Zaangfah tein nan thlacamnak ah ka philh hin hlah uh. Pathian nih Myanmar thluachuah ko seh,” ati.
HHUK lutlai pawl sinah phuahnak ca a ṭialmi hmanthlak zong a tar chih.
