Myanmar mipi thimmi MP pawl nih Dr. Sasa cu United Nations (UN) palai ah an thim.
Dr. Sasa nih, “Myanmar mipi nih democracy phungning tein an thimmi MP pawl nih Rampumpi Hluttaw Aiawhtu Kawmiṭi (CRPH) an dirh i United Nations palai ah an ka thim,” tiah tuni ah thawng a thanh.
February 1 ah ralkap nih mipi thimmi NLD uknak a chuh hnu in, mipi thimmi MP pawl (NLD deuh lawngte) nih “kanmah hi mipi thimmi kan si i cozah dik kan si tiin CRPH (Committee Representing Pyidaungsu Hluttaw) an dirh. Anmah nih cun an thimmi si. Ralkap nih an thimmi si lo.
Dr. Sasa nih, “mi ralṭha Myanmar mipi aiawhtu dingah an ka thim cu kaa lawm tuk hringhran.
“Ramdang vialte hna, Myanmar rammi nuai 54 hi kan dirpi ulaw zei tik hmanh ah uknak chuttu ralkap bawi 6 hi dirpi hna hlah uh tiah kan sawm hna.
“Hopaoh nih Myanmar mipi duhnak hi upat ding le dirpi hrimhrim ding asi.
“Myanmar mipi nuai 54 na kan dirpi duh lo ahcun mipi a hremtu le uknak chuttu ralkap bawi 6 hi nan dirpi hna tinak asi.
“Mi ralṭha Myanmar mipi nih ralkap hremuknak an dohmi cu teinak lam a panh thluahmah cang, uknak chuttu ralkap bawi le anmah ṭanhtu pawl cu an i chuih lai i an tlu lai, uknak chuttu le anmah ṭanhtu pawl cu tuanbia nih bia a ceih hna lai.
“Zei tik hmanh ah a sung kan khan lai lo, zei tik hmanh ah kan sung tiin kan i ap lai lo, Democracy nih a tei lai, Freedom nih a tei lai, Thildik nih a tei lai.
“Upat awktlak Myanmar mipi le Myanmar ram hi Pathian nih thluachuah pe ko seh,” ati.
