- US ram Washington um Myanmar Tanzung rianṭuan 5 CDM an tuah ve
- Los Angeles um Myanmar Tanzung rianṭuan 2 CDM an tuah ve
- Geneva um Myanmar UN Zung rianṭuan 3 CDM an tuah ve
- Germany khualipi Berlin um Myanmar Tanzung rianṭuan 1 CDM a tuah ve
- Ram 19 um Myanmar Tanzung rianṭuan 100 leng CDM an tuah
Ramdang um Myanmar tanzung rianṭuan palai 10 leng nih, “ralkap caah rianṭuan kan duh lo” an ti i zungkai loin CDM an tuah ve, tiah Irrawaddy tadinca nih a thanh.
US khualippi Washington um Myanmar Tanzung rianṭuan 5 nih, “ralkap cozah caah rianṭuan kan duh lo, CDM kan lut,” tiah thawng an thanh.
“Ralkap nih mipi thimmi cozah a tlaihhren hna i uknak a chuhmi hna le buai lo tein sandahpiahmi mipi a thahnawnmi hna hi kan ngaihchia tuk,” an ti.
Ralkap nih February 1 ah uknak a fir thok in atutiang thla 1 chungah buai lo tein sandahpiahmi minung 54 leng a thah cang hna. A zaza a hliam hna. A thongthong a tlaih hna.
Tanzung rianṭuan pawl nih, “November 2020 thimnnak phichuak kha ralkap nih upat law uknak hi mipi kut ah pe ṭhan tiah kan in nawl,” an ti.
November 2020 thimnak ah teinak a hmumi MP thar pawl cu February 1 ah Hluttaw meeting tuah in riankhinh biakamnak tuah ding an si. An tuah manh hlan, dei hlan ah ralkap nih a tlaih viar hna i uknak a chuh hna.
Ralkap le a party USDP nih zeihmanh tatte um lo rumro le lih hrokhrawl in ‘mee diklo tamtuk a um’ an i titer i uknak an fir hi si. Ralkap bawizik Min Aung Hlaing hi tu kum tanṭim ah kum 65 tling ding si i pension la ding si caah a tapeh USDP he i bawm in uknak an chuh lawlaw hi si, tiah cheukhat nih an purhdah ve.
US ram Los Angeles khua um Myanmar Tanzung ruahnak petu U Aung Kyaw Naing zong nih, “tuni thokin CDM ka lut ve cang lai,” tiah tuni ah a thanh ve. Kum 30 chung bak Myanmar ramdang vuanci zung caah rian a ṭuan cangmi si – tanzung cu ramdang vuanci zung tangum si.
“March 3 ah ralkap nih zalam cungah buai lo tein sandahpiahmi mipi a thahnawnmi hna ka hmuh ah ka celh lo,” tiah a chim. Mah ni ahhin ralkap nih minung 28 an kah thah hna.
Mah pinah, UN headquarters a umnak Switzerland ram Geneva khuapi um Myanmar UN Zung secretary 1 le 2 le an rianṭuan hawi 1 (dihlak 3) nih, “kan ram ah democracy lenter ṭhan dingin aa zuammi mipi kan in dirkamh hna. CDM ah kan lut ve lai,” tiah an thanh ve.
Germany khualipi Berlin um Myanmar Tanzung secretary Daw Chaw Kalayar nih, “mipi thimmi cozah uknak a chut i sualnak ngei lo mipi le ramkheltu pawl a tlaitu ralkap caah rianṭuan ka duh ti lo,” tiah a thanh.
“Tuksapur in rammi a thattu ralhrang bu caah rianṭuan ka fih,” ati.
Rampumpi Hluttaw Aiawhtu Kawmiṭi (CRPH) nih Germany Myanmar palai rian aa ka pek si cun mah rian tu cu ka ṭuan deuh lai, ati.
Los Angeles khuapi um Myanmar Tanzung rianṭuan Daw Mya Mya Kyi zong nih, “CDM ka tuah ve, ralkap cu mipi thimmi cozah asi lo caah anmah nawlpekmi ka zul lai lo,” ati ve.
Acunglei langhtermi palai vialte nih, “buai lo tein kan duhmi langhternak nawl kan ngeih bantukin kan duhmi kan langhtermi si. Myanmar mipi kan in dirkamh hna. Kan rian in kan i phuak lo (a caan phak tikah ṭuan ṭhan te dinng),” an ti.
Myanmar UN palai U Kyaw Moe Tun nih UN General Assembly ah, “uknak firtu ralkap ka cohlang lo, UN nih asi khawh chungin ralkap uknak kan hrawhpiak,” tiin a chim hnu ah atu bantukin ramdang um Myanmar cozah palai pawl mipi lei an ṭan cio hi si.
Asia in nitlak lei ram tiang, ramdang um Myanmar mipi nih an umnak ram Myanmar Tanzung cio ah ralkap duhlonak an langhter i tanzung rianṭuan pawl cu “CDM tuah ve uh …Myanmar mipi lei ah ṭang uh,” tiin an fial hna.
US, UK, Norway, China le Japan telh in ram 19 um Myanmar Tanzung rianṭuan 100 leng CDM an lut, tiah Myanmar Ramdang Vuanci Zung nih naite ah a thanh cang.
