Mizoram state cozah lutlai CM Pu Zoramthanga nih, “Myanmar ralkap ruangah a zaammi Myanmar mipi cu India rampi cozah nih khirh/lo bia a khiah hlan caankarlak dornak le rawl kan pek hna lai,” tiin nizaan ah a chim.
Palek rank niam le an chungkhar tampi cu ralkap caah rianṭuan an duhlo caah CDM an lut i himnak kawl in Mizoram ah an zaam.
Nain, Myanmar cozah nih “a zaammi palek 8 kha rak tlai hna law kan kua” tiin Mizoram cozah ca a kuat caah India nih a tlaih kuat hna ahcun an him lai lo ti phan a um ngai.
Palek 8 cu Falam palek (Chinmi) an si.
Mizoram State Cozah Lutlai (Chief Minister) Pu Zoramthanga nih, “Ram 1 ah ramkhel buainak a chuah ruangah himnak kawl in innpa ram ah a zaammi hna cu tlaih in kuat awk an si lo ti cu hngalh cio asi ko,” tiah nizaan interview ah a chim.
“Nain a donghnak biakhiaktu cu India rampi cozah asi. Mizoram cozah he kan i chawnbia ko nain zeihmanh bia fiang a kan chimh rih lo caah ralzaam pawl hi zeitin dah kan tuah hna lai ti kan i fiang ve lo.
“Hartong bawmhnak mit in zoh ahcun, rawl kan pek hna hau, dornak kan pek hna hau,” tiah a chim.
Mizoram le Myanmar ram cu vawlei kaupi in aa rimi si caah luh a fawi ngai. Mah ruangah Myanmar in minung zeizat sat dah an zaam cang ti fiang tein hngalh khawh colh asi lo.
Pu Zoramthanga nih, “minung 20 in 30 kar hrawng an hung zaam cang,” tiah a chim.
Nain, Mizoram khualipi Aizawl palek bawi nih, “Myanmar palek le an chungkhar 100 dengmang an hung zaam cang. Mizoram pengkulh (district) 5 ah an lut,” tiah a chim.
A zaammi palek pawl nih, “Sandahpiahtu mipi tukvelh, tlaih le thahnawn dingin ralkap nih nawl a kan pek caah kan duh lo i kan zaam,” tiin India/Mizoram cozah sinah an chim.
Ralkap le palek nih sandahpiahtu minung 50 leng an kah thah cang hna. 1,800 leng an tlaih cang hna. Minung tampi hmailei ruahchannak ngei lo dirhmun tiangin an kah hliam hna.
India cozah nih China ralchanhnak caah Myanmar ralkap hi kawi bantukin aa tlaihmi si caah a zaammi pawl tlaih le kuat kong hi India caah biakhiah a har ngai lai.
Pu Zoramthanga, kum 76 nih, “Mizoram mipi tampi cu Myanmar ah chungkhat le phunkhat tampi an ngei hna, hi bantuk dirhmun an ton tikah an thinphan piak tuk hna.
“An cungah zawnruahnak kan ngeih hrimhrim a herh,” tiah a chim.
