Ralhrang Myanmar ralkap tangka luhnak nganbik a si vemi lungvar mansung sipuaizi cu US cozah nih a phihpiak (dantat).
US Tangka Vuanci Zung nih, “Myanmar ramchung lungvar mansung vialte a tlai dihtu Myanmar ralkap company Myanmar Gems Enterprise (MGE) cu phungninglo Myanmar ralkap cozah tangka luhnak hrampi asi caah kan phihpiak,” tiah a thanh.
“Kan phihpiaknak aruang cu Myanmar ralkap tangka luhnak car ter kan duh caah asi,” tiah US Tangka Vuanci Zung tangum Ramdang Chawva Tlaihnak Zung hruaitu Pi Andrea Gacki nih a chim.
Cucaah, MGE company nih US ram ah a ngeihmi chawva vialte cu hman khawh lo dingin phih dih an si cang. Cun, US company le US rammi he sipuaizi tuahnak nawl onh asi ti lo.
Sinain, China le ramdang he cun sipuaizi a tuah kho peng ṭhiam ko lai.
February 1 ah Myanmar ralkap nih uknak a fir hnu in atutiang ah duhlonak langhtertu rammi 600 leng a thah cang hna. Ngakchia zong tampi an i tel. Minung 3,500 a tlaih cang hna, cheukhat cu a thlah hna nain 2,750 cu atutiang a thlah hna lo.
Uknak chuttu ralkap bawi pawl, an chungkhar le an company cheukhat cu US cozah nih phihkhamnak a tuah cang hna.
Uknak a chuh hnu ah a tlaihmi Aung San Suu Kyi le President Win Myint cu a rannak in thlah hna, tiah US cozah nih a auhnawh nain azei poi lo.
Na rel cang maw?
