The Chin Express nih kan theih khawh tawk ah Canada ram ahhin Chin khrihfabu a tlawmbik 12 an um.
Sinain, Canada cu Chinmi an tlawm caah khrihfabu cheukhat cu member an tlawm te, cucaah an chawva zong a tlawmte i mi bawm kho dirhmun an si lo caah tangka in refugee la kho ding an si lo.
Cozah Ngunkhuai Zung (CRA) ah min khumhmi Chin khrihfabu ngan pawl an tangka lut le chuak (revenue and expense) kan zoh hna tikah khrihfabu 2 hi cu refugee a la kho an si ‘kho men’ tiah kan ruah.
Refugee a la kho an si ‘kho men’ tiin ruahmi Chin khrihfabu 2
- Vancouver Chin Baptist Church le
- Chin Baptist Church – GATINEAU hi an tangka lut le chuak kan zoh tikah kum 1 ah tangka hlei dollar ting 1 hrawng peng an ngei.
Khrihfabu min in refugee lak khawhnak ding ahcun cozah sinah Sponsorship Agreement (SA) minthut a hau.
SA ah minthut khawhnak ding ahcun kum 1 ah refugee 5 cung a la khomi khrihfabu si a hau. Refugee 5 laknak ding ahcun a tlawmbik dollar ting 1 hrawng a dih.
SA minthumi cu Sponsorship Agreement Holder (SAH) tiin cozah nih a auh hna. SAH si hnu ahcun khrihfabu min in kum fatin tangka in Malaysia le India um Chin refugee an lak khawh cang hna.
Chin khrihfabu chungah SAH pakhat hmanh an um rih lo.
SAH a simi Ethiopia khrihfabu pakhat ‘Ethiopian Evangelical Church in Ottawa’ hi acunglei langhtermi Chin khrihfabu 2 he aa tluk hrawng asi. 2019 an khrihfabu tangka lut (revenue) hi $325,724 asi i $179,939 an hman. Tangka hlei $145,000 hrawng an ngei tinak asi.
Vancouver Chin Baptist Church khrihfabu i 2018 an tangka lut hi $470,649 asi i $261,694 an hman. Tangka hlei $208,000 hrawng an ngei — 2019 le 2020 an tangka lut/chuak cu CRA nih a langhter rih lo. 2018 hi hnu bik a langhtermi si.
Chin Baptist Church – GATINEAU khrihfabu i 2019 an tangka lut hi $224,141 asi i $109,098 an hman. Tangka hlei $115,000 hrawng an ngei.
Cucaah, acunglei Chin khrihfabu 2 hi cu Malaysia le India um Chin refugee lak an duh hna ahcun Sponsorship Agreement ah min a thu kho dirhmun an si. Nain, biakinn saknak caah silole khrihfabu caah thil nganpi tuah dingin tangka an i khon lio asi ahcun Malaysia le India taang an miphun lak kong cu an buaipi kho rih lai lo. Mah ruang ah, a la kho an si ‘kho men’ kan tinak asi.
Khrihfabu si loin pumpak minung 5 i bawm in tangka in laknak kong cu mah hi hmet law kan ṭial ciami rel khawh asi.
Charhchan:
- Private Sponsorship of Refugees Program – Government of Canada
- Becoming a Sponsorship Agreement Holder – Government of Canada
- Canada Revenue Agency – Government of Canada
- Charities Directorate of the Canada Revenue Agency (CRA)
Theihternak: US le Australia ahcun kum fatin tangka hlei dollar ting tampi a ngeimi Chin khrihfabu an tampi ko nain, khrihfabu in refugee laknak lam (program) a um lo. Canada hi lam a um caah Canada thengte kan zohnak asi, kan miphun pakhat hnih ca tal ah santlai hnga maw, ruah phu si hnga maw tiin kan ṭialmi asi.
