Tuni Nirukni ah India ram ah Covid-19 mizaw thar 400,000 leng an hmuh hna. Nikhat te ah mizaw thar tambik an hmuh hna a si.
Ngandamnak Zung i cazin ningah Covid-19 mizaw thar 401,993 an si. An ram ah zawtnak ngei hmuhmi dihlak 19.1 million an si cang. Cun, liamcia suimilam 24 chungah Covid-19 in a thimi 3,523 an si, a thimi dihlak 211,853 an si cang.
Nain, thiamsang tampi nih Covid-19 testnak an i zat lo ruangah a thimi le mizaw cazin hi hinak in a tam kho an ti.
Nifatin Covid-19 mizaw thar 10,000 tang an hmuh hna hnu in India cozah nih tu kum thok inkhan phihkhamnak a tuahmi tampi a hon hna.
March thla dongh lai inkhan Covid-19 mizaw an hung karh tuk buin biaknak hmun le ramkhel cawlcanghnak ah mi abubu in umnak nawl a pek hna.
April thla chung lawng ah India ram pumpi ah Covid-19 zawtnak ngei hmuhmi 7 million an si.
Tuni ah Bharuch khua ah a ummi dot 4 sizung pakhat a kaang i Covid-19 mizaw 16 le nurse 2 an thi.
Hika sizung ahhin Covid-19 mizaw 50 hrawng an um i zaanttim 1:00 am ah mei kangh aa thok. – AFP
