March thla dongh lei inkhan Karen hriamtlai phu- KNU Brigade (5) hmun ah KNU le ralkap i kahnak in ralkap 200 dengmang an thi.
March 27 thokin tu thla thok tiang ah KNU le ralkap i kahnak in ralkap lei in minung 194 an thi, 220 hliam an pu. KNU lei zong in minung 9 an thi, 10 hliam an pu.
KNU lei biachimtu Ralbawi Saw Kler Doh nih, “Ralkap lei in a thimi lakah ralbawi zong an i tel,” tiah a chim.
Thla 1 leng chung KNU le ralkap i kahnak ah ralkap nih KNU Brigade (5) hmun chungah raltuknak vanlawng voi 27 in bomb voi 47 in a tthut hna. Cun, voi 407 an i kap.
Cu pinah, ralkap lei nih khua chung le lo pawl ah hriamngan bomb voi 575 an puah. Cu ruagnah, khuami 14 an thi i 28 hliam an pu. Inn 20 le sianginn 2 telhin khuami thilri tampi a rawk.
KNU nih atu hrawng cu thilkuatnak lam pawl a kham dih ruangah ralkap cheukhat cu eiawk an ngeih ti lo caah khuami sinah tangka ting 50, motor 1, facang tun 20 telhin thilri tampi an chuh hna tiah KNU nih a ti.
Atu hi ralkap zung lei nih Kayin sate ah ralkap 500 leng a kuat hna i kahdohnak a chuak tthan kho, a thimi le a rawkmi a tam chin lai tiin khuami an thinphang.
Nifatin kahdohnak ruangah KNU le ralkap nih Hpapun-Kamah lam telhin cawlehnak le khualtlawnnak lam tampi an kham caah khuami tampi cu dineiawk lungrethei in an um. – KIC
