Kuala Lumpur: Malaysia Rianngeitu Phu (Malaysian Employers Federation – MEF) nih, “Full lockdown (FMCO) hi a rannak in donghter cang,” tiin nizaan ah cozah an hal.
“Kan ram sipuaizi a rawk tuk cang i minung tampi khuasaktintuknak ah harsatnak an tong cang,” an ti.
“Ni kum March thla ah avoi 1nk MCO nan tuah thok in dawr tampi kharter dih an si caah kan ram sipuaizi a rawk tuk cang. Mi tampi tangka lut an ngeih ti lo pinah a sungh bakin a sungmi an tam chin lengmang cang,” tiah MEF President Datuk Dr Syed Hussain Syed Husman J.P nih a chim.
“Nunnak kan khamh ti zongah khuasaktintuknak ruah chih a herh.
“Full lockdown hi fak tukin nan rengh caah sipuaizi hme deuh pawl cu an sipuaizi a thi thluahmah cang.
“Riannngeitu (chawlettu/boss) pawl hi full lockdown fak piin rengh le zulhphung buarmi fak deuh in dantat an duh ve ko, nain khuasaktintuknak kong hi ruah chih hrimhrim a herh.
“Cozah nih zei bantuk rian/sipuaizi paoh on/ṭuannak nawl pe hna seh ti kan duh. Hitin a khap peng rih ahcun, caan saupi chung kan ram sipuaizi a tla lai i mipi harnak an tong lai,” ati.
“Sehzung pawl, thilpuan dawr pawl le nitin nunnak caah a herh lomi dawr pawl hi atu bantukin caan saupi on le ṭuan nan khap peng hna ahcun dawr thong tampi cu an pioh thai lai.
“Sipuaizi hme deuh le a laifang pawl cu damh khawh ti lo tiangin an tuar cang caah a rannak in bawmh an hau.
“Mah pinah, atu lio i cozah nih ṭuan onhmi dawr pawl zong hi thil an laknak phohte pawl kha ṭuan onh an si lo caah harnak tampi an tong ve.
“Apoi khunmi cu, rianngeitu pawl harnak an ton lawng si loin an rianṭuantu pawl zong rian an ngeih ti lo caah an chungkhar rawl peknak le herhhai cawknak caah harsatnak an tong ve.
“A rannak in rian vialte ṭuan on zokzok le tangka bawmhnak pek zokzok an hau,” ati.
“Rampumpi COVID-19 Raikhamsi Chunhnak Simanking nan tuahmi thawng hin pulrai cu donghlei a panh thluahmah ko lai nain tuan ahcun a thiang thlu kho lai lo i cumpi tlangrai le raifanh zawtnak bantukin pah chih a haute lai.
“Kan rianṭuan le an chungkhar pawl zong raikhamsi i chun cio dingin kan forhfial hna. Atu zong aa chunmi an karh thluahmah ko.
“Kum 60 chung asi cangmi kan nulepa hna cu chunh an hngak peng rih ko, cheukhat cu chunh nicaan appointment zong an ngah rih lo tiah kan rianṭuan pawl sin in kan theih.
“Mah nih hin kan rianṭuan cheukhat cu rian ṭuan siarem lo le lungawṭawm in a umter hna.
“Cucaah, kum 60 cung minung paoh cu a rannak in chun viar hna uh tiin cozah forhfial kan duh,” ati.
Ruah ding: Malaysia um ralzaam pawl cu China sermi raikhamsi ‘CanSino’ kan chunh hna lai, tiin cozah nih a chim caah Chinmi tampi cu kan duh lo. Kan mawh lo, nain raikhamsi chunh lo ahcun rianṭuan le chawhvahnak tampi a kan donh khawh.
