Thawngpang thar: Sianpahrang nih, “PM Muhyiddin Yassin cu PM in aa phuak cang. Amah cozah vuanci vialte zong an i phuak dih cang. Nain, Hluttaw Niam MP pawl nih anmah chungah PM an i thim khawh hlan cu Pu Muhyiddin Yassin nih ‘innhngak PM’ a ṭuan chung rih lai,” tiah tunai ah thawngthanh.
Atanglei hi hmasa ah ṭialmi asi.
Malaysia ram hruaitu Prime Minister Pu Muhyiddin Yassin (alai hmanthlak) nih tu zingka ah siangpahrang sinah PM in ai phuahnak ca a va pek cang.
Pu Muhyiddin Yassin a party Bersatu nih cozah tlaihnak caah a herhmi MP tling tein an ngah khawh lo caah UMNO party MP pawl he an i fonh i PN tiin ‘ṭangṭi cozah (coalition government)’ an tlaih. Nain nai hrawngin UMNO party MP pawl nih kan in ṭanpi ti lo an ti caah cozah tlaihnak caah a herhmi MP an tling ti lo i aa phuah hi asi.
Pu Muhyiddin Yassin cu Malaysia tuanbia ah Prime Minister (PM) caan tawibik a ṭuanmi asi. Thla 17 chung te lawng a ṭuan.
Tu hnu minutes tlawmpal ah Pu Muhyiddin Yassin nih PM in aa phuahnak kong TV in thawngthanhnak a tuah lai.
COVID-19 pulrai ruangah Malaysia ah minung thong 12 leng an thi cang i 1 million leng zawtnak an i chawn cang. Zawtnak karh hlah seh tiin lockdown an tuahnak ah an ram sipuaizi fak tukin a tla fawn. Mah lio ah hitin cozah tlaitu Bersatu le UMNO party karlak ah i rem lonak chuak i cozah an kuai chap cu Malaysia mipi caah apoi ngai.
Malaysia ah COVID-19 zawtnak a karh chin lengmang caah le lockdown a sau tuk cang caah liamcia ni tlawmpal chung kha Pu Muhyiddin Yassin cu zuamcawhtu party pawl le mipi nih soisel a tong ngaingai.
Aho nih dah PM rian a chan lai ti hngalh asi rih lo. PM changtu (Deputy PM) a simi Datuk Seri Ismail Sabri Yaakob nih a chan te men lai asiloah PH party hruaitu Datuk Seri Anwar Ibrahim nih a chan te men lai, tiah zumh asi.
Hi hna 2 ahhin hodah MP tam deuh nih an ṭanpi ti hngalh asi rih lo. MP tam deuh nih an ṭanpimi paoh nih PM a ṭuante lai.
Malaysia phunghram ahcun, Hluttaw Niam MP 222 chungah acheu fai 112 a tlinhmi party nih cozah (PM) tlaih asi. Zei party hmanh nih MP 112 an ngah lo caah party dang he i ceihhmai in ṭangṭi cozah tlaih hau an si hna.
