Malaysia ram, Penang state ah kuli rianṭuanmi Myanmar nu cu Malaysia pa nih a tlaihhrem pinah tangka RM200 damiah a ṭaih. Misualpa cu biaceihzung nih aamahkhan in a thlah.
Myanmar nu cu October 12 ahkhan rianṭuan pawl umnak inn/asawng ah a ih lio deilei 4am ah Malaysia pa Zul Mazuan, kum 25 nih a hngawng ah namte hmuah in a tlaihhrem i damiah a ṭaih.
Myanmar nu nih palik sinah a report i an tlaih. Tuni ah biaceihzung ah an chuahpi i sualnak phun 3 in taza an cuai.
Pakhatnak cu hramhram in Myanmar nu a kaa ah a chiaṭha a chiah tiin Sualman Upadi 377B in taza an cuai. Biaceihzung nih ‘a sual’ tiin bia a chah ahcun a tambik kum 5 in 20 tiang thongthlak khawhnak upadi asi.
A tlaihhrem hnu ah RM200 damiah a ṭaih chihmi cu Sualman Upadi 392/397 in taza an cuai. A saubik kum 20 tiang thongthlak, tangka liamter le fung in tuk khawhnak upadi asi.
Namte hmuah in a tlaihhremmi kong ahcun Sualman Upadi 376 (2)(b) in taza an cuai. A sau bik kum 10 in 30 tiang thongthlak pinah fung in tuk chih khawhnak upadi asi.
Zul Mazuan a sihni nih, “Tangka aamahkhan in thlah chung uh. Hringtu apa nih aamah a khan piak lai…,” tiin biaceihzung a hal.
Biaceihtu Noor Aini nih, “Biaceihzung nih bia kan chah hlan chung cu minung 1 nih RM50,000 in aamahkhan piak seh, cun Myanmar nu hnahnawhnak pe hlah sehlaw thlah chung si ko seh,” ati i an thlah chung.
November 29 ah biaceihzung ah a kong an ceih ṭhan te lai.
Misualpa hi liamcia caan zongah ritsii ruang le sualnak tuah ruangah palik nih tlaih bal cangmi asi.
