Malaysia ah minung fir in tangka in tlanhter a hmangmi Myanmar rammi 3 cu palik nih an tlaih hna.
October 21 zaan 8pm ah Myanmar rammi Rohingya 3 nih anmah Rohingya pa Saddik Mohammad Jalil, kum 26 an fir i tangka RM3,000 in rak tlanh uh tiin a chungkhar an tlerh hna.
October 25 ah palik nih an tlaih hna.
Minung fir in tangka in tlanhter a hmangmi Myanmar rammi 3 cu Abdul Rahim Ali Husson, kum 38, Taher Ahmad Mustafa Ahmad, kum 42, le Mostaque Ahmed Rofiq Ahmed, kum 36 an si.
An dihlak in ‘ralzaam kan si’ tiin UNHCR card aa tlaihmi an si.
Malaysia media nih cun minung fir hmang misual pawl hi “Myanmar rammi” ti lawng an langhter nain an min le an mui (hmanthlak) hi Rohingya lawngte an si. Malaysia um Myanmar rammi pawl kan min an chiat ter ngai.
Penang State, Butterworth Peng Biaceihzung ah November 1 ah taza an cuai hna. Taza an cuainak hna case biaceihzung ah an rel piak hna lio ahcun ‘kan fiang ko’ tinak caah an lu an suk.
October 21 ahkhan Penang state, Batu Kawan khua sehzung hmai ah Rohingya pa cu motor in an fir.
October 25 ah Kedah state, Sungai Petani peng i Sungai Layar khua Kampung Masjid sang inn pakhat ah palik nih fir tongmi pa cu an va khamh khawh i an firnak motor 1 le tangka 3,000 zong an tlaih.
Tangka cu fir tongmi pa chungkhar nih an tlanhnak asi men lai, tiah an zumh.
Minung fir hmang Myanmar rammi 3 he aa bawmmi an hawipa pakhat zong palik nih tlaih dingin an kawl cuahmah lio asi. Myanmar rammi asi ve.
Minung Fir Upadi Dal 34 in taza an cuai hna. Biaceihzung nih ‘an sual’ tiin bia a chah ahcun thah (thih dan pek) asilole fungfek in tuk pinah nun chung thongthlak khawhnak upadi asi.
December 3 ah biaceihzung ah an chuahpi than te hna lai.
