Malaysia nih ‘a tlaibik January 1 ahcun ramdang khualtlawng pawl caah ramri ka on cang lai’ tiah tuni ah a chim. COVID ruangah atutiang ramri a phih peng.
Malaysia kumtling paoh cu COVID-19 raikhamsi an chunh dih ngawt cang hna caah liamcia thla tlawmpal cun ramchung chawhvah, rianṭuan le zatlang cawlcanghnak khapmi pawl a on thluahmah cang hna.
Malaysia ram hruaitu hlun Pu Muhyiddin Yassin (hmanthlak) hi atu lio Malaysia Sipuaizi Tunmernak Zung hruaitu asi, “Kan ram ah ramdang khualtlawng kan luhter hna lo caah khualtlawnnak lei sipuaizi aa tunmer a rau tuk,” ati.
“Ramdang khualtlawng an um lo ahcun, khualtlawnnak sipuaizi (hotel, nuamhnak hmun, tbk) a tuahmi pawl hi fawi le bai ah an sipuaizi an pehzulh kho lai lo.
“Sinain, COVID a karhnak hnga lo ralrin peng ka hau rih. Cucaah khualtlawng pawl cu COVID-19 test an hau te lai.
“Cun, ramkip khualtlawng kan luhter hna lai lo. COVID-19 zawtnak a karh ti lonak rammi pawl lawng kan ram ah tlawnnak nawl kan pek hna lai,” ati.
Ramri onnak kong cu zeitik ah dah thawng fiang kan thanhte lai, timi balte a chim lo, nain “mah kong hi cu ngandamnak le ram himnak zung nih an ceih lio asi,” ati.
Tu zarh thokka ahkhan Malaysia nih, “Raikhamsi aa chun cangmi Singapore rammi cu November 29 thok cun quarantine um lo tein zalong tein kan ram ah tlawn khawh asi cang lai,” tiin thawng a thanh.
Indonesia ram he zong raikhamsi aa chun cangmi cu quarantine hau loin i tlawn dingin lungtlinnak an ngei.
Myanmar cu atu hi COVID-19 zawtnak a karh lingcing asi peng rih pinah raikhamsi aa chunmi zong an um huaha lo caah January 1 hlan ah ramri ong hmanh sehlaw fawi le bai ah Malaysia tlawn ngah dawh asi lo.
