Kalaymyo peng, Sisan khuami Pu Biak Ngei Sang, kum 48 cu November 15 ah uknak firtu ralhrang Kawl Ralkap nih an lakmi PDF-Kalay battalion 3 sakhan pawngah a hngawng tan in an thah i nizaan November 19 ah khuami nih a ruak an va lak.
Pu Biak Ngei Sang cu ramtang ah tolre lo a tuah caah November 14 khan lo ah a kal.
Sisan khuami pakhat nih, “Mah ni zingka ah a nupi nih phone a ka chawnh,” tiah a chim.
“Lo ah thei ka va ṭo ta lai i zingka 7am hrawngah ka rak tlung te lai, tiin kan pa nih aa ka ti. Nain chunnitlak phone ka chawn kho lo. A thaizing ah a phone ka call mi voi 2 a lut nain phone an thah i a lut kho ti lo, ati.
“Mah hnu cun a chungkhar an lungrethei tuk cang. A zal chungah namte pakhat, radio, phone le bailep an um. Nain namte le phone cu um ti lo. A kut 2 ningin hmailei ah kedan hri in an ṭem. A hngawng naam in an tan.
“Thah a tongmi a upa nih November 15 zingka tlanglo ka kal lio ah Kawl Ralkap keneh ka hmu lo ati. A thaizing zingka ka tlun ahcun tlanglo pawngah ralkap 100 hrawng keneh ka hmuh, rawl an chuannak pawl zong ka hmuh. A rauh hlan ah PDF-Kalay sakhan lei in meithal le bomb thawng ka theih, ati.
“Kawl Ralkap nih PDF-Kalay sakhan an kah hlan ahhin an pawngkam ah zaan 1 riak cang hna sehlaw a lo.
“Kawl Ralkap an riahnak hmun in PDF-Kalay sakhan hi a lang. Cheukhat nih cun thah tongmi pa nih hin sakhan umnak a chimh hna, an ti. Hihi a dik lomi si. Amah cu alo pawngah an thahmi si.
“Ralkap pawl cu Sethmuh Zone in Second khua nitlak lei ah an kal. Cun, Zeechaung nitlak lei in an kai ṭhan i PDF-Kalay sakhan hnulei tlang in an i hel hnu ah sakhan thlanglei in an kah hna hi si,” ati.
Pu Biak Ngei Sang ruak cu November 19 zaanlei 4pm ah an vui. A nupi le an fale 4 a rohtak hna. Tantakmi chungkhar cu nunnak kawl in Kalay khuapi ah an zaam.
Ref: Zalen
