Myanmar ram uknak firtu ralkap bawizik Min Aung Hlaing nih hmai zarh Nihnihni (Nov 30) ah uknak a chuhmi Pi Aung San Suu Kyi thongthlak dingin bia a chah cang lai.
Nobel daihnak laksawng cotu Pi Aung San Suu Kyi cu Min Aung Hlaing le a ralkap pawl nih February 1 ah uknak an chuh thokin nihin tiang thong an thlak peng i biaceihzung ah voi tam ngai a kong an ceih cang, i hmai zarh Nihnihni ah bia chahnak tuah an timh hi si.
Min Aung Hlaing le a ralkap pawl nih uknak an fir hnu in duhlonak langhtertu mipi 1,200 leng an thah cang hna. Minung 10,000 leng an tlaih thongthlak cang hna. Thantlang khua inn 300 leng an khangh cang.
Ralhrang nih upadi tam ngai in Suu Kyi taza an cuai. ‘Ralkap cungah buainak chuahpi dingin mipi na forh hna’ ti zongin taza an cuai. Mah upadi pakhat te hmanh hi kum 3 tiang thongthlak khawhnak upadi asi.
Nain, hriamnam hmangin uknak firtu ralkap le USDP pawl khuakhan hi hngalh khawh asi rih lo. An duh paoh in an ṭawn i tazacuainak upadi an chap lengmang caah hmai zarh Nihnihni ah Suu Kyi sualnak kong bia chah ding an timi zong hi an thawn te khawhmi asi.
Ralkap ser ukmi Naypyitaw biaceihzung ah Suu Kyi kong an ceih lio vialte zong media pawl luhnak nawl an pe hna lo i Suu Kyi a sihni pawl zong media sinah biachimnak nawl an pek hna lo caah zapi nih a chung thil sining hngalh khawh asi lo.
Suu Kyi cu;
- License ngei lo walkie-talkie na hman
- 2020 Thimnak lai mipi mee pek sawmnak tuah lio ah COVID-19 upadi na buar
- Cozah thlithup upadi na buar
- Thimnak diklo na tuah i mee na fir, tbk an ṭawn khawhmi paoh in taza an cuai i hnu ah sualnak an chap chih lengmang.
Kum 76 asi cangmi Pi Suu Kyi cu Nikhatni in Ningani tiang hi ni fatin ngawt in uknak firtu ralkap cozah biaceihzung ah an chuahpi peng ko.
Myanmar ram ah caan sau ngai a rak ummi David Mathieson nih, “Suu Kyi hi kum tampi thongthlak dingin bia an chah te lai ti ka zumh ko,” tiah a chim.
Kum 165 thong thlak
Tu thla thokka ahkhan Suu Kyi party NLD member 2 cu Min Aung Hlaing nih kum 90 le 75 tiin kum 165 bak thong a thlak hna. Uknak a fir hnu in avoi 1nk bik a chiahru bikmi thongdan a pek hna asi.
Kayin state Tangka Vuanci Pu Than Naing cu Min Aung Hlaing nih ‘kum 90 chung rianhrang ṭuanter chih dingin’ thong a thlak.
Kayin state vuancichoh hlun Nan Khin Htwe Myint zong kum 75 thong a thlak.
