Tanglam in Malaysia a ra Kawlrammi 17 cu kan hnu zarh Ningani zingka 9:30am ah kan tlaih hna, tiah Kedah state palik bawi nih tuni ah media sinah a chim.
Anmah a phawrtu Malaysia rammi 3 zong kan tlaih hna, ati.
“Phungninglo in a rami Myanmar rammi 17 cu Malaysia rammi 3 nih motor 3 in an phorh hna. Lam tanṭim ah Kedah Palik Sakhan le Bukit Aman Palik Sakhan in CID pawl nih an kham dirter hna. Motor mongtu Malaysia rammi 3 cu kum 40 in 40 kar an si.
“Motor 3 cu an check i Myanmar rammi nu 12 le pa 5 an hmuh hna. Kum 21 in 44 kar an si. Malaysia ratnak visa zeihmanh an ngei lo.
“Myanmar rammi 17 le Malaysia rammi 3 cu Kota Setar District Palik Zungpi ah an kalpi hna.
“Myanmar rammi an puaisa nih Malaysia rammi 3 cu ‘minung 1 phorh man ah RM200 kan pek hna lai’ tiin a fial hna.
“Malaysia rammi 3 cu an dihlak in Perak state ah ummi an si. Kubang Pasu pawngum Changloon ah Myanmar rammi 17 cu an va lak hna i Perak um inn pakhat ah chiah dingin an kalpi hna lio lampi ah an tlaih hna hi si.
“Mah kong cu Lahwahkah Upadi 1959/63 i Phungninglo Minung Luhpi case in hlathlainak kan tuah lio asi.
“Ni 28 chung palik sakhan thong ah kan hren hna lai i mah chung ah hlathlainak kan tuah lai. Cu hnu ah biaceihzung ah tazacuai le biakhiah asi te lai.
“Kan state ah phungninglo in ramdangmi lut kho lo dingin Kedah palik nih pehzulh in kan i zuam peng lai,” ati.
