CDF-Senthang le CDF-Hakha kar ah i theihthiam lonak nganpi a um. CDF-Hakha nih cun kan sinah i fonh hna seh ti a duh, nain CDF-Senthang nih nizaan ah CDF-Hakha in an chuah ṭhannak kong cathanh a chuah.
“CDF-Senthang cu kanmah tein ralkap uknak a dongh tiang kan dir peng ko lai,” ati.
Nizaan tihni November 30 ahkhan CDF-Hakha nih, “October 26 ah General Meeting kan tuah i CDF-Senthang cu CDF-Hakha Battalion 2 (Senthang) tiin kan i fonh ko lai tiah biachahnak tuah asi bantukin CDF-Senthang cu a um ti lo,” tiin cathanh a chuah.
Nain, atu bantukin an i ṭhen ṭhan hi si.
CDF-Hakha Battalion 2 (Senthang) tiin an i fonh hnu ah an chuah ṭhan i CDF-Senthang tiin an dir ṭhannak kong cu hitin a fianter.
“CDF-Senthang kan dir cang tiin cathanh kan chuah hnu ah CDF-Hakha upa he tonnak kan ngei. CDF-Hakha cu Hakha peng dihlak caah tuahmi asi tiin CDF-Hakha ah i fonh dingin an kan sawm. Cucaah mipi duhnak zulh dingin kan lungtling. Cu bantukin dot khat hnu dot khat meṭing kan tuah. October 26 general meṭing ah CDF-Hakha Battalion 2 (Senthang) tiah i fonh dingin biachahnak kan tuah. Hi biachahnak hi kan upat i kan cohlan.
“Sinain, CDF-Hakha Policy le Structure zoh dingin le CDF-Hakha Battalion 2 (Senthang) hruaitu thar thim ṭhan dingin November 23 ah general meṭing kan tuah ṭhan tikah CDF-Hakha Policy le Structure nih Senthang mipi funtomnak a chuahpi khawh lo caah hruaitu thar zong an i thim kho lo. Cucaah CDF-Senthang cu pehzulh asi.
“CDF-Hakha nih Hakha pengah kanmah CDF-Hakha le CNF/A dahlo hriamtlai phu dang um khawh asi lo a timi cu kan cohlang kho lo,” ati
CDF-Senthang le CDF-Hakha thawhkehnak kong zong a fianter.
“CDF-Hakha nih Hakha peng huap in CDF-Hakha kan dirh lai tiah Senthang upa sinah sawmnak a rak um bal lo. April 5 ah CDF min in Senthang peng ah rianṭuan dingin Senthang khua pakhat ah meṭing tuah asi. Cu ni thokin CDF min hmangin Senthang peng ah rianṭuan hram aa thok. CDF-Hakha an dirhmi zong Senthang hruaitu pawl nih theih asi lo. Cucaah CDF-Hakha nih Senthaang peng a huap kho lo.
“CDF-Hakha cu April 14-15 ah an dirhmi asi. CDF-Hakha an dirhmi cu CDF-Senthang kan dirh cang tiin cathanh kan chuah hnu lawngah kan theihmi asi,” ati.
Atang ah CDF-Senthang nih CDF-Hakha in a chuahnak kong cathanh a chuahmi tling tein rel khawh asi.
