Nizaan January 12 khuadei hlan ah Myanmar ralkap nih Karen hriamtlai phu KNU brigade 5 umnak vanlawng in bomb a kahmi cu ‘vawlei ah ke ralkap kan tei tuk hna caah vanlawng tiang an hmanmi si’ tiah KNU brigade 5 ralkap phu nih a chim.
KNU brigade 5 ralkap phu cu ni fatin Myanmar ralkap he an i kap peng i ni fatin Myanmar ralkap an thih peng pinah ke ralkap pawl zong nih KNU brigade 5 hmunhma kal an duhlo caah atu bantukin vanlawng in an kan kahnak hi si, tiah KNU brigade 5 hruaitu Buhmu Saw Htoo Ka Shaw nih a chim.
“Myanmar ralkap hmaikal tamtuk kan thah hna. Tam tuk an thih caah an thatho deuh seh tiin vanlawng in an kahmi si. An thachia tuk cang. An cung bawi nih nawl an pekmi hna zong ke ralkap pawl nih an zul duh ti lo. Cucaah an ralkap thathawhnak caah vanlawng le hriamnam ngan in an kan kahmi si,” ati.
January 12 khuadei hlan 1am ah Dwe Lo peng, War Khade Sizung umnak cu Myanmar ralkap nih vanlawng in bomb an kah. Inn cu an rawk nain hohmanh a thimi le hliam tongmi an um lo, tiah KNU nih a chim.
Zaan ah an kah hna caah an kahnak hna vanlawng phun cu an hliah kho rih lo. Zaan 12:45am hrawngah Yangon ramthen, Hmawbi pengah raltuknak vanlawng a zuanmi kan hmuh, tiah khuami nih an chim.
Minutes 2 hnu hrawngah Dwe Lo peng, War Khade Sizung cu vanlawng in bomb 2 an kah i a rawk. Le Gay Hta khuate ah bomb 3 an tla puak.
Cun, KNU brigade 5 hmunhma Kawkareik peng, khua chung bakah vanlawng in an kah hna i miakpi zongin an kah chih hna caah khuami 11 hliam an tong i 1 a thi.
Mah pinah, Kaya state khualipi Loikaw khua chung zongah Kaya hriamtlai pawl zong vanlawng in an kah hna i inn tlawmpal an kaang.
