Magway ramthen, Aunglan khua ah ralkap duhlonak langhtertu mipi cu ralkap nih meithal in an kah hna. Cuka hmun ah a rami ruh sibawi thiamsang ralkap bawi buhmu telh in minung 6 an i citmi motor cu January 11 zaan 11pm ah aa let i buhmu telh in 4 an thi.
Mingladon Ralkap University ah buhmu rank a simi pa le a chungkhar 6 cu pumpak motor in Aunglan khua ah an kal i atu bantukin accident an ton hi si. Accident an tonnak hi ralkap duhlonak langhtertu mipi meithal in an kah hna nak asi.
“January 11 zaan 11pm fai ah Mingladon Ralkap University i ruh sibawi thiamsang buhmu le a chungkhar (an dihlak minung 6) cu Honda/Insight motor in Aunglan khua in Meiktila lei ah an kal.
“Aunglan palik sakhan hmai ah motor cu lamsir lei ah an kuaih i lamkam thinkung an pah i buhmu telh in minung 4 an thi.
“Khuaruahhar ngai simi cu, accident an ton i thihnak hmun hi ralkap duhlonak langhtertu mipi an rak kah hna nak zawn bak asi.
“Micheu nih an chim ning ahcun, motor an mongh lio ah pakhatkhat an hmuh i an hrialnak thingkung an pah hi si an ti,” tiah khuami pakhat nih a chim.
Motor aa citmi 6 lakah 4 cu an thi i 2 zong fak piin hliam an ton caah an nunnak caah thinphang ngai asi.
