Malaysia ah tuksapur in COVID-19 zawtnak a karh. Nizaan ni 1 chungte ah zawtnak hrik ngei thong 31 leng (31,005) bak an hmuh hna.
Vanchiat lei vanṭhat ah an dihlak dengmang (99.39%) cu fak in an zaw lo. A zei taktak hmanh ti lomi zong an tampi.
Fak piin a zawmi cu minung 194 lawng an si, tiah Ngandamnak Vuanci Zung i director-general Dr. Abdullah nih tuni ah a thanh.
194 chungah 92 cu kum 60 cung lawngte an si. 91 cu zawtnak dang a ngei chihmi an si i 3 cu naupawi lio nu an si.
Minung 45 cu raikhamsi aa chun lomi an si. 108 cu voi 2 lawng aa chun i voi 3nk aa chun lomi an si. 41 cu voi 3nk zong aa chun komi an si.
UNHCR Thawngthanh
“Malaysia ah COVID-19 zawtnak a karh tuk caah raikhamsi aa chun rih lomi le voi 3nk aa chun rih lomi ralzaam vialte a rannak in chunh i zuam cio uh…,” tiin UNHCR nih tuni ah ralzaam bu pawl thawng a thanh hna.
