Tu zingka ah Russia President Vladimir Putin nih Ukraine ram um Russia ralkap pawl cu ral tuk hram thok dingin nawl a pek taktak cang hna.
Putin nih thawngthanh cangka in Russia ralkap nih missile in Ukraine khualipi Kyiv an kah colh. Ukraine khuapi dang zong an kah len hna.
![](https://thechinexpress.com/wp-content/uploads/2022/02/russia-1024x576.jpg)
Kyiv khuabawi nih, “Khuami vialte hohmanh lengah chuak loin inn chungah um dih uh,” tiin ralrin a pek hna.
Russia tefa kan si aa timi tapung tampi an umnak Ukraine ram, Donetsk khuapi lebang cu bomb puah thawng nih a hninh dih. Mah khua ahhin nizaan tihni ah Russia ralkap tam taktak tank tampi in an lut.
![](https://thechinexpress.com/wp-content/uploads/2022/02/Russia-1-1024x576.jpg)
US nih, “Fak chiahru in Russia sipuaizi kan phih chap lai,” tiin thawng a thanh colh ve.
Zahan zaanṭim thokin Ukraine cozah nih a ram cungah vanlawng zuan a phih khap cang. Khualtlawng vanlawng tampi cu Ukraine ram ah ṭum loin an kir dih.
![](https://thechinexpress.com/wp-content/uploads/2022/02/ukraine-1024x576.jpg)
Russia zong nih Ukraine he aa rimi nichuahlei states pawl ah khualtlawng vanlawng zuan a phih ve. “Khualtlawng vanlawng himnak (kahthlak an tonnak hnga lo) caah kan phihmi asi…’ ati.
Sinain, mah ca kan ṭial lio tiang ahcun Ukraine ralkap le Russia ralkap cu an i kap rih lo. Nizaan tihni ah Ukraine ram i Russia cikor tapung an umnak state 2 ah a lutmi Russia ralkap pawl nih tank in Ukraine an kahmi lawng asi rih.
![](https://thechinexpress.com/wp-content/uploads/2022/02/Ukraine2-1024x576.jpg)
Ukraine ram chung i “Russia bawmhmi tapung an umnak khua pawl ah ralkap cawlcanghnak thok dingin President Putin nih a ralkap nawl a pek hna. A rauh hlan ah Russia ralkap le Ukraine ralkap zong an i kap cang lai. Ukraine ralkap pawl nih a sungkhan ulaw nan hriamnam chia uh, ati hna,” tiin Russia media nih a thanh.
![](https://thechinexpress.com/wp-content/uploads/2022/02/Ukraine3-1024x576.jpg)
US UN Palai nih, “Russia nih Ukraine ramri ah vanlawng zuan a phih cang. Ukraine ram, Donbas state ah ralkap torlecheng a luhter hna. Russia nih Ukraine rampumpi tuk lak a timh cang…,” tiin zahan zaan UN Security Council meeting ah a chim.
![](https://thechinexpress.com/wp-content/uploads/2022/02/Ukraine4-1024x576.jpg)
Russia nih Ukraine cozah umnak an khualipi Kyiv tuk in Ukraine rampumpi lak a timh, tiah zumh asi.
![](https://thechinexpress.com/wp-content/uploads/2022/02/Ukraine5-1024x576.jpg)