Ukraine ralkap pa nih Russia tank khamnak caah a nunnak pek in hlei ah bomb aa puah.
Ukraine Ralkap Zung nih, “Kan ralkap Vitaly Skakun nih Kherson region thlanglei um Henichesk hlei ah nunnak pek in bomb aa puah,” tiah thawngthanh.
“Russia ralkap tank pawl an rat thluahmah caah, Skakun nih namchan in hlei cu a va tlik hnawh i bomb a puah.
“Hlei cu a hrawh khawh dih, nain a zaam kho manh lo.
“A ralkap phu nih an chimnak ah, Russia ralkap tank an ratnak lam i hlei bomb ka va puahta lai an kan ti i a va tli.
“A ralṭhatnak thawngin, kan ral cu sau lakte an i tap, a ralkap phu zong hmun dangah an i ṭhial kho i ral kahnak hmunhma an la kho manh.
“Ram caah a nunnak aa pemi upatnak laksawng sangbik kan pek lai.
“Ram chuttu Russia pawl nih thei uh, kan in khangh viar hna lai! Kan in kah peng hna lai, kan thih hlan lo. Kan nun chung paoh kan in doh peng hna lai (a sung kan khan bal lai lo)!,” ati.
Atu cu Russia ralkap tank pawl Ukraine khualipi Kyiv an lut kho cang.
A zaam duh bak lomi Judah miphun a simi Ukraine President Volodymyr Zelensky nih, “Kyiv khuami vialte datsi bomb i ser ulaw a kan ramhtu doh cio uh,” tiin a sawm hna.
Ukraine President nih nizaan tihni ahkhan EU hruaitu pawl he online meeting an tuah lio ah “Atu hi ka nun lio a donghnak bik nan ka hmuh asi kho men, hnu nan ka hmuh ṭhan tik cu ka ruak asi te men lai…,” tiah US le NATO nih ralkap in an bawmh duh lomi a lungfahnak le zaam loin thih tiang a ram ven aa timhnak kong a chim.
Mah lio cun, Russia President Vladimir Putin nih, “Ukraine ralkap pawl nih Pu Zelensky hi pawnchuah ulaw nan ram uknak la uh…,” tiin a forh hna.
Russia nih Ukraine khualipi Kyiv ah a ummi Ukraine rampumpi cozah hruaitu pawl hi tlaih silole thah viar hna in Ukraine ram lak a timh. Nain a lak hnu ah dengteo in Russia ram ah ser loin amah nih a ukmi minung pawl kha cozah a ṭuanter hna lai i cutin amah nih puanzar phen in a uk lai, tiah zumh asi.
US ralkap reng sang pawl nih, “Russia nih aa tinh ning tluk rang in Kyiv a luhhnawh kho lo, a ruahning nakin aa harh deuh,” an ti.
