Cozah uknak hramhram in a chuttu ralkap nih Asho Chin National Party cu rianttuan tti dingin a sawm.
Nain, Asho Chin National Party nih a cohlang lo.
Asho Chin National Party i General Secretary Salai Aung Min Hlaing nih, “Hmunhma ttha kan in pek hna lai a kan ti nain kan ttuan duh lo caah kan cohlang lo.
“Hmunhma ttha duh ruangah a dirmi le a cawlcangmi party kan si lo.
“Kan miphun zalong tein i uk khawhnak, tlangcung miphun hna nih ramkhel covo kan ngeih khawh nak hnga biatak tein aa zuammi party kan si.
“Cu ruangah, hi bantuk hmunhma ttha rian pek sawhsawh hna cu kan duh lo caah kan cohlan lomi a si,” tiah a chim.
Asho Chin National Party nih nizaan ah ralkap lei nih phone in an chawnh hna hi a si.
Mah kongah, Myanmar actor Zenn Kyi nih, “Kan ngakchiat lio ah pekmi paoh i lak hlah, danghmi paoh ei hlah! tiin upa pawl nih an rak kan cawnpiak bal. A taktak ahcun mah limhaang ca khi a si ko” tiah a ti.
Atu bantuk in Asho Chin National Party thil tuahmi cu mi tampi nih an thangthat len. Thangthat phu zong a si.
CNLD zong nih February 4 ah Ralkap uknak duh lo langhternak cathanh a chuah. Cun, ralkap nih rianttuan tti dingin a kan sawm ahcun kan cohlang lai lo a ti fawn.
