Aung La N Sang nih zahan zaan ah Brazil pa Ataides cu an i ṭhuat cangka in tlu lakin a thongh i puaipiat (KO) in a tei colh.
An i ṭhuat cangka in Aung La nih alu ah chuih i a pehpeh in thongh thluahmah i buantlang ah a det. Ataides nih aa khamh chih ve i a tlaih len ve nain Aung La nih a chuih chap i Ataides nih a hliamh kho lo.
Aung La cu vawleicung MMA nipiah minthang bik si vemi Henri Hooft sinah ṭhuat a cawngmi si bang a mi chuih le thongh cu sobul nganpi in tuk bantuk asi caah Ataides a ri hnik lengmang i ṭha tein a cawl manh huaha lo.
Netherland pa Ridder nih Aung La a rak teinak mi tlaih-thluk daan khan Ataides nih a tlaih ve nain Aung La nih mah kuat kha aa rak phet khawh tuk cang ai, fawi tein aa phuak kho.
Mah hnu cun Aung La lawngte nih sum phomh in a phomh ko.
Alu ah chuih i buantlang ah a det colh. A vorhlei kut he kehlei kut he sum phomh bakin a phomh. Kehlei kuttum bakin mincimh thongh bakin a thongh i Ataides cu buantlang ah aa bek ṭhan. A tlaih ve len nain World Champion pahnih hmanh a ngah balmi hrat cu a khuk in a suk i a tlai kho thai lo.
Mah cangka in kehlei kut he vorhlei kut he a pehpeh in voi 8 bak sum phomh in a phomh i Ataides cu a lungfim huaha ti lo. ‘Ka pa, ra ka chanh cang’ timi muihmai a keng cang. A donghnak ah Aung La nih vorhlei kuttum in a kha ah thongh ciammaam cu… 2015 lio Hakha leimin cimh bantuk bakin ṭuangah ‘phung’ a tlu.
Dailuci nih a rannak in a zuanhnawh hna i Aung La cu a kham, cutin puaipiat (KO) bakin a tei. Round 3 aa ṭhua ding an si nain round 1 bakah puaipiat in a tei colh. Aung La a uar bal lomi hmanh nih nizaan cu an uar dih lai.
Aung La: Aa ka ngamhmi paoh nih ka singkhaw uh
Aung La cu a tei hnu ah interview an tuah i, “Ataides interview an tuah lio ah Aung La nih aa ka ṭih ati. Hohmanh ka ṭih hna lo ti hmuhsak ka duh tuk cia cang. Hohmanh kan ṭih hna lo. Middleweight aa ṭhuami vialte, aa ka ngamhmi paoh nih ka singkhaw uh, kan i phomh hna lai,” tiah a chim.
Aung La cu a thi lin tuk i Ataides a tei cangka in buan lengah a va tli i ONE Championship boss/chairman Chatro Sityodtong a va chawnh.
“ONE Championship boss ka va chawnhmi cu, ahopaoh ra chuahpi hna ka ti ko hen cu.
“Ready bak ka si. Champion ka rak si lio ah mi tampi nih ṭhuat an ka duhnak kong an rak chim len. Welterweight champion Kiamrian Abbasov te hna nih ṭhuat a rak ka duh. Kan hngah ko hna hih, ra chuak uh, kan i phomh hna lai,” ati.
Aung La champion a rak si lio ahkhan cun ahopaoh nih ṭhuat khawh a rak si lo. ONE Championship phungphai ah champion cu amah tang pa ṭhawngbik lawng nih ṭhuat khawh asi. Atu cu champion si ti lo caah aho he paoh i ṭhuat khawh si cang. “Champion ka rak si lio ah ṭhuat aa ka duh nain aa ka ṭhua kho lomi pawl ṭhuat khawh ka si cang hih, a duhmi paoh ra uh” ati duhnak si.
“Yushin Okami hmanh nih phomh a rak ka duh (Aung La nih a rak tei ciami Japan pa asi). Bigdash (Russia pa) he zong avoi 3nk i phomh khawh si (Ridder nih avoi 2nk a tei lio kha Aung La le Bigdash aa ṭhua ding an si nain Bigdash COVID-19 a ngeih caah ruah lo piin Ridder he an ṭhuat ter ṭhanmi hna si). Kan i phomh hna lai. Ready ka si,” tiah a chimchap.
