Atu hi Malaysia cu COVID-19 zawtnak a karh tuk lio asi. Ni fatin mizaw thong 15 hrawng peng an hmuh hna.
Tuni zong COVID-19 zawtnak ngei minung thong 18 dengmang an hmuh hna.
Malaysia um Chinmi tampi zong COVID-19 in kan zaw ve. Malaysia Chinmi zohkhenhnak bu Alliance of Chin Refugees (ACR) Chairman James Bawi Thang Bik (acung bik hmanthlak) nih, “Atu lio hi COVID-19 in Chinmi ni khat pakhat nawn in kan thi,” tiah a chim.
“Malaysia um Chinmi chung in atu ni tiang ah ni khat pakhat nawn in covid-19 in a thi mi kan um peng caah Malaysia um Chinmi nih ramdang ummi kan unau pawl hna i thlacam bawmnak kan herh ngaingai. Malaysia um nan chungkhat le hna he zong pehtlaihnak tha tein rak tuah peng u law tiah nawl kan duh hna,” ati.
COVID-19 zawtnak ngei an karh tuknak aruang cu zawt hmelchunhnak (symptoms) a ngei lomi pawl nih minung tamtuk an chawnh hna caah asi. An pum chungah COVID-19 hrik a um ko nain an zeihmanh ti lo caah zawtnak an ngeihmi an i hngalh lo. Tikah an inn ah ummi le anmah he aa naihniammi vialte an chawnh dih hna. Anmah cu an dam nain an chawnhmi hna tampi cu vanchiat an tong.
Cucaah, Malaysia um Chinmi hna, ka zeihmanh ti lo, ka khuh lo, ka taklin lo, ka dam ko tiin mi inn ah len lo ding. Mi zong i lenter lo ding. Inn zongah ralring tein um cio i zuam hna usih. Mi inn len cu cozah zong nih a khap i theih ahcun RM50,000 tiang dantat khawh asi.
