Australia Hluttaw ah tlaihhrem tu le horduhcuai tuaitam tu pawl cu cozah nih fak piin dan na tat hna lo, tiin mipi an thinhung tuk. Liamcia zarh tlawmpal zongah Australia khualipi Canberra le rampumpi ah minung thong tampi nih duhlonak an langhter.
Mipi thinhun daihternak caah, tuni ah Australia ram hruaitu Prime Minister Scott Morrison nih, “MP, biaceihtu le cozah rianṭuan pawl cu ‘rianṭuannak hmun ah horduhcuai tuaitam upadi’ in ngaihthiam an si ti lai lo,” tiah a thanh.
“Horduhcuai in tuaitam cu cohlan khawh ding asi lo.
“Thil ṭha lo asi pinah fihnung le sual hmanh asi … rianṭuannak hmun ah nu an him lo ahcun anmah minung an himlo pinah an tangka luhnak le khuasaktintuknak zong a him lo.
“Hopaoh aa tluk tein a theipar zunter dih si cang lai,” ati.
Atu lio Australia upadi ahcun; Rian na ṭuan hawi silole na cung boss nih horduhcuai in an tuaitam ahcun palek sinah report khawh asi nain; MP, biaceihtu le cozahrianṭuan pawl cu report khawh an si lo. Annih cu an in tlaihhrem taktak lawngah report khawh an si.
PM Scott Morrison nih, “Horduhcuai in tuaitam a tongmi nih thla 6 chungah report ding timi zong kha kum 1 tiang caan sau deuh kan pek cang hna lai,” ati.
Cozah tlaitu Pu Morrison party Liberal Party zung ah rian a ṭuanmi kum 26 nu Brittany Higgins nih, “Ka rianṭuan hawi MP pakhat nih aa ka tlaihhrem,” tiah 2019 ah a phuan.
A cung bawi Pi Linda Reynolds (Runvennak Vuanci) a chimh nain ‘palek sinah report hlah’ ati pinah ‘mi lih chim na si’ ati chap. Mah ruangah Australia mipi an thinhung tuk. Hnu ah Pi Reynolds nih ‘mi lih chim na si’ a timi cu ngaihthiam a hal ṭhan.
Mah pinah; Australia upadi bawizik (attorney-general) le Sehzung Vuanci Pu Christian Porter cu pakhat nu nih “kum 16 ka si lio kum 1988 ah aa ka tlaihhrem” tiin palek sinah a ripawt. Thla tlawmpal hnu ah minu cu a thi i palek nih “ripawt tu um lo ahcun mah tlaihhrem case hi kan pehzulh kho lo” an ti.
An rank an ṭhumh hna
Prime Minister Scott Morrison nih Pu Christian Porter cu Australia rampumpi upadi bawizik (attorney-general) le Sehzung Vuanci in a phuah i Pi Michale Cash a saṭhu ter.
Rank niam deuh a simi Industry, Innovation le Science Vuanci rian a pek.
Pi Linday Reynolds zong Runvennak/Ralkap Vuanci sinak in a phuah i Pu Petter Dutton a saṭhu ter.
Rank niam deuh cozah rian sawhsawh a ṭuanter ve.
