England (UK) khualipi London um Myanmar tanzung lutlai Kyaw Zwar Minn cu ralhrang Myanmar ralkap duhlonak a chim ruangah ralkap minung nih an pawnchuah, tanzung cu ralkap nih an tlaih/fir cang.
Nizaan ahkhan tanzung cu ralkap minung nih an lak cang. Kyaw Zwar Minn cu tanzung chung lut kho loin lamkam ah tawh an hrenh khenh.
Kyaw Zwar Minn nih “mipi thimmi Daw Aung San Suu Kyi le President Win Myint thlah hna uh …” tiin cathanh a chuah ruangah ralkap minung pawl nih tanzung an chuh hi si.
Tanzung lutlai Kyaw Zwar Minn nih, “Ralkap minung pawl nih tanzung cu a kan chuh, an fir,” tiah a chim.
“Leng ka chuah kar ah tanzung chungah an lut i an lak.
“Naypyitaw nih a kan fialmi si, an ti i an ka luhter duh lo. British (UK) cozah nih na kan bawmh hau.
“Tanzung an lak cang. Ralkap tapeh pawl nih tanzung an kan chuh. Keimah changtu pa kha caankarlak tanzung lutlai ṭuanter an timh,” ati.
Mah kong he pehtlai in AFP media nih Myanmar ralkap cu bia a hal nain a let duh lo.
England (UK) ramdang vuanci Dominic Raab nih, “Phungninglo Myanmar ralkap cozah nih nizaann ah London ah thlanglamhnak a tuahmi hi kan cohlang lo, Kyaw Zwar Minn a ralṭhat caah upat ka pek,” tiah a chim.
“Uknak nan chuhmi le tuksapur buainak nan tuahmi hi ngol ulaw democracy lenter ṭhan uh, tiah UK nih kan in fial hna,” ati.
London um Kawlrammi pawl cu zahan zaanlei kha pawnchuahmi tanzung lutlai Kyaw Zwar Minn he tanzung lengah sandah an piah hna.
