Model Paing Takhon cu tuni deihlan sml 5:00am hrawng ah ralkap nih a inn ah an tlaih tiah a unu nih Facebook cahmai ah a ttial.
Nizaan ah ralkap ngeihmi Myawaddy TV nih Paing Takhon cu Sualnak Upadi Dal 505(a) in tazacuainak case tuahpiak a si tiin a thanh hnu tu zingka ah an tlaih hi a si.
“Tuni deihlan sml 5:00am ah palek le ralkap motor 8 in Paing Takhon cu an rak tlaih. North Dagon Township ah a ummi a inn ah an rak tlaih. Paing Takhon cu a dam lo lio si fawn i thlacamnak in rak kan bawm cio uh” tiah Paing Takhon a u May Chit Tway nih Facebook ah a ttial.
Paing Takhon nih an tlaih hlan deuh ahkhan “Ka dam lonak a sau ngai cang. Kan ram pi ah deihnak um zau sehlaw, a ngadam ko seh tiin thla ka cam fatin ka cam chih peng. Cun, kei zong ka dam zau nak hnga thlacamnak in ka bawm ko sawh uh” tiah a Facebook cahmai ah a ttial.
Paing Takhon cu February 1, 2021 ah ralkap nih uknak a lak hnu thok in ralkap duh lo langhternak hmun ah a cawlcangmi a si.
Ralkap nih amah a domi le sandahpiahnak ah aa telmi minthang pawl cu Sualnak Upadi Dal 505(a) in tazacuainak case a tuahpiak dih hna i tlaih dingin a kawl hna.
Cutin tazacuai tongmi minung 120 leng an um i, tlaih khawh cangmi hi minung 10 hrawng an si.
Tlaih cangmi minung 10 hrawng lakah Lu Min, Ye Deight, social social media influencer Win Min Than te zong an i tel.
Minthang tam deuh cu ralkap tlaih ding an duh lo caah atu hi an i thup hna.
Ralkap nih tazacuainak case a tuahpiakmi hna upadi hi an sual ko ti ahcun kum 3 tiang thongthlak khawhnak upadi a si. – RFA
