Hluttaw Niam MP/Rep. an thim tharmi Republican party member Pi Marjorie Taylor Greene nih, “Joe Biden cu January 21 (president asi thaizing) ah phuah dingin tazacuai usih tiin Hluttaw ah biatung ka dirh colh lai,” tiah Newsmax media ah a chim.
Pi Greene cu November 3 Thimnak ahkhan Georgia state ah Republican party in Hluttaw Niam (House) MP/Rep. aa cuh i teinak a hmumi si.
“American mipi aiawh in thawngthanh ka duh, kan hruaitu hna hi an tuhmi theipar zunter an hau, president nawlngeihnak buar zong azei poi lomi le ramdang cozah, China zinan company pawl le Ukraine zinan company pawl nih fawi tein cawk khawhmi minung cu US president caah asi kho lo, cucaah January 21 ah Joe Biden phuah dingin tazacuai (impeach) usih tiin Hluttaw ah biatung ka dirh colh lai,” tiah a chim.
“Obama acozah lio i Vice President a ṭuan lio kum 2015 ahkhan, Joe Biden nih Ukraine cozah sihni Viktor Shokin hi nan phuah lo ahcun US cozah nih bawmhnak tangka $1 billion kan in pe hna lai lo tiin Ukraine cozah a rak tlerh. Sihni Viktor Shokin cu zinan company Burisma dirhtu pa tazacuai dingin a rak hlat lio asi. Joe Biden fapa Hunter Biden hi kum 2014 in 2019 tiang Burisma company ngeitu (board member) ah aa tel ve,” tiah Pi Greene nih a chim.
Phun dangin chim ahcun, Joe Biden nih a fapa Hunter Biden luat ter (bawmh) a duh ruangah US cozah bawmhnak $1 billion bak Ukraine cozah a rak pe duh lo. Nawlngeihnak ningcang loin a hman, tiah Pi Greene nih a chim, tiah The Hill tadinca le Fox News nih an thanh.
Sinain, ruahchannak a um lo ngai. Pi Greene hi kha hlan ah palai a tuan bal lomi (Hluttaw ah mithar te) asi pinah, Hluttaw Niam (House) he Sang (Senate) he Democrat palai an tam deuh caah a hlawhtlin ding cu ruahchannak a um lo.
On January 21st, I’m filing Articles of Impeachment on President-elect @JoeBiden.
75 million Americans are fed up with inaction.
It’s time to take a stand.
I’m proud to be the voice of Republican voters who have been ignored. #ImpeachBiden#QuidProJoe #BidenCrimeFamily pic.twitter.com/E83s1iOoVF
— Marjorie Taylor Greene ?? (@mtgreenee) January 14, 2021
