Zahan zaan ah SAC ralkap pawl nih Chin Oo Si sangum Myanmar Economic Bank le Chin State Cozah Zung (atu lio SAC Zung) pawngah bomb le meithal an puah caah pawngkam mipi ther le phang in an zaam hna.
Cuka pawng ummi mipi vialte rianrang in sang dang an chungkhat sinah an zaam thluahmah hna.
Myanmar Economic Bank thlang Nazareth sang (Chin OO Si sang chung) ummi nih, “Kannih zong atu hi sang dang um chungkhat sinah zaam kan i timh liopi si. Motor ah thil kan khin liopi asi. Kan buai ngai.
“Tuni 2pm hlan ah kan sang (Nazareth sang) chuahtak dih uh an ti caah a rannak in kan zaam hi asi.
“Nizaan cu 7:30pm hrawngin meithal le bomb puah thawng aa thok. Mah cangka in kan inn pawng ummi pawl cu sang dang chungkhat sinah an zaam dih hna. Atu hi inn 5 hrawng lawng kan tang i zaam kan i timh ve hna liopi asi.
“Kan inn pawng ummi inn 2 zong September 8 le 9 ah SAC ralkap bomb nih an tlak hna i fak tukin an rawk hna. Inn dang zong meithal kuan nih a khen hna i an rawk tuk hna. Mah ruangah September 8 thokin hohmanh hnangam in kan um ngam ti lo.
“Atu cu rianrang in zaam kan hauh caah thil kan timh lio si i kan buai tuk, kan zaam khawh in kan i chawn ṭhan te lai,” ati.
A zaammi hi SAC zung pawng Nazareth sang mipi an si. SAC nih bomb le meithal in inn tampi an kah hrawhnak zawn asi. Nazareth sang cu Chin Oo Si sang chungah a ummi si. Chin Oo Sii sang ningpi asi lo. Khuathar leikam Chin Oo Si mipi cu an zaam rih lo.
Hakha mipi an himnak hnga thlacam bawm cio hna usih.
Note: Hmanthlak kan tarmi hi cu September 9 dei hlan ah SAC nih bomb in an kah hrawhmi Nazareth sang inn pakhat asi.
