Thantlang kahdohnak ah kum 1 ngakchia telh in minung 5 hliam tuar

,

Tu zaanlei 1:30pm hrawngin Thantlang khua chungah CDF-Thantlang le Kawl Ralkap i kahdohnak a chuak i kum 1 ngakchia telh in minung 5 hliam an tuar, tiah khuami nih an chim.

RFA nih Thantlang khuami kan chawnh hna lio 3pm tiangah meithal thawng kan theih peng rih, an i kahnak pawng ummi inn 1 zong a kaang tiin khuami nih an chim, tiin a ṭial.

“Kum 1 ngakchia, kum 15 nute le pi tar 3 hliam an tong.

“Thantlang Baptist Biakinn pawng le No. 1 Sianginn pawngah an i kap. Atutiang hi meithal thawng kan theih peng rih. Inn 1 zong a kaang,” tiah himnak ruangah min langhter duh lomi khuami pakhat nih RFA sinah a chim.

CDF-Thantlang nih, “Kawl Ralkap 2 kan thah hna. Kanmah CDF-Thantlang cu hliam tongmi kan um lo. Kawl Ralkap nih duhpaoh in an ruahnak paoh meithal he bomb he an kah caah khuami 4 hliam an tong,” tiin a thanh ve. Hliam tongmi hi 4 timi ahhin kum 1 ngakchia an rel chih/lo hngalh asi lo.

August 25 zongah CDF le Kawl Ralkap i kahdohnak a chuak i Kawl Ralkap nih hriamnam ngan kuan nih a khen caah kum 10 ngakchia pate a thi i khuami 2 hliam an tong.

Mah pinah, mipi inn pakhat cungah a tlami a puak lomi Kawl Ralkap bomb pakhat an zoh lio ah a puak i inn ngeitu pakhat le a fapa an thi. Adang 9 hliam an tong.