Chinram Vengtu Ralkap (CDF) – Hakha nih nizaan May 20 thok in Hakhua khuapi le Hakha peng pumpi ah zaan lengchuah a khap.
“Zaan 10pm in zingka 5am kar ah hohmanh leng chuak hlah uh. Lengchuah lo awk ṭha lomi mizaw nan um ahcun CDF phone number +91 8731 0589 86 ah thawng kan thanh hmasa uh,” ati.
Zaan lengchuah a khapnak aruang cu, “Kawl ralkap (SAC) nih Hakha peng hmun kip ah zaanṭim le khuamang ah ralkap bawmtu an i kua, khuapi chungah an vak, inn an baoh, phungninglo in mipi an tlaih hna, minung fa lo bang mipi an velh hna. Cucaaah, tu hnu thawng kan in thanh ṭhan hna hlan tiang cu zaan 10pm in zingka 5am kar cu CDF nih nawl onhmi mizaw phor mawṭaw ti dah lo hohmanh lengchuak hlah uh,” ati.
“Kawl ralkap pawl cu uniform hruk loin mipi mawṭaw le thil phor mawṭaw in Hakha peng ah bawmtu an i kua. Mipi harnak pek dingin mipi an vaih (kawl) hna.
“Cucaah, mipi nih mawṭaw nan i cit tikah ruahkham (muka) khup hlah ulaw thlalangawng kha ong peng uh.
“Mipi himnak caah check nan ton ahcun, phunzai lo tein zul uh. Hitin ralrin kan in pekmi hna hi ṭha tein nan zulh lo ahcun nan nunnak caah thinphang tuk asi,” ati.
